Femînîst, mafparêz û siyasetmedaran bi kampanyayeke îmzeyê piştevanî dan kampanyaya KJAR’ê. Kampanyaya ku jin pêşengtiya wê dikin, ji bo sekinandina cezayên darvekirinê û parastina mafên mirovan li seranserê cîhanê belav bûye û piştgiriyê distîne.
ZÊDETIRÎ 1700 ÎMZE
Di nava sê hefteyan de zêdetirî 1700 hatin komkirin ku di nava îmzevanan de xelatgirê Aştitê ya Nobelê Adolfo Perez Esquivel, Dayikên Plaza De Mayo, serokên sendîkayan û gelek parlamenter cih digirin.
Kampanyaya ku bi pêşengtiya Arjantînê dest pêkir, gelek welatên weke Meksîka, Avûstralya, Swêd, Kolombiya û Kubayê piştevanî dayê.
ÎMZE DÊ JI WEZARETA KARÊN DERVE YA ARJANTÎNÊ RE WERE TESLÎMKIRIN
Rêxistinên femînîstan, saziyên mafên mirovan, sendîka, zanîngeh, tevgerên civakî û nûnerên partiyên siyasî beşdarî kampanyayê bûn. Îmzeyên ku hatine komkirin û nameya daxwazan dê ji aliyê delegasyoneke ku ji saziyên civakî û nûnerên jinan pêk tê, ji Balyozxaneya Îranê û Wezareta Karên Derve ya Arjantînê re were teslîmkirin.
Di nameyê de hatiye destnîşankirin ku cezayê darvekirinê sûcê li dijî mirovahiyê ye û hatiye daxwazkirin ku tavilê cezayên darvekirinê yên derheqê Pexşan Ezîzî, Werîşe Mûradî ve Şerîfe Muhammedî de hatine dayîn, bi temamî werin betalkirin.
PEYAMÊN PIŞTEVANIYÊ
Ji pêşengên kampanyayê Pedro Perucca (Poder Popular), Macarena Asenjo (Red Chilena contra la Violencia hacia las Mujeres) û Lilian Dawnes ê Arjantînî, bi peyamên dijîtal piştevaniya xwe ya ji bo kampanyayê diyar kirin.
Ji Buenos Aires’ê Pedro Perucca diyar kir ku rejîma Îranê piştî qetilkirina jina ciwan a Kurd Jina Emînî zexta xwe ya li ser jinan zêde kiriye û piştevaniya mezin a ji bo kampanyayê weke pêngaveke erênî pênase kir.
Macarena Asenjo ya ji Şîlîyê jî destnîşan kir ku divê ji bo betalkirina cezayê darvekirinê yê li sê aktîvîstên jin hatî birîn, nerazîbûn werin nîşandan û got: ‘’Têkoşîna van her sê hevrêyên me yên jin banga me ya ‘Ji Darvekirinê Re Na, Ji Jiyana Azad Re Erê’ xurt dike. Jin, Jiyan, Azadî.’’
Rojnamevana femînîst a Arjantînî Lilian Dawnesê jî ev yek anîn ziman: ‘’Divê Rejîma Îranê tavilê biryara cezayê darvekirinê ya derheqê Pexşan Ezîzî, Werîşe Mûradî û Şerîfe Muhammedî de betal bike. Ez ji vir bang dikim ku divê tavilê ev her sê jin werin berdan.’’
