Firotina bi awayekî online ya tîşortên ku wêneyên Torosa Spî li ser hene bû sedema nerazîbûnên mezin. Ev tîşort sembola bi hezaran kuştinên failnediyar û kesên di bin çavan de hatine windakirin. Torosên Spî, bi taybetî jî weke wesayîtên ku di tarîtiya salên 90’î de di gelek 17 hezar 500 cînayetên failên wan nediyar de hatine bikaranîn, tên zanîn.
Hevseroka Komeleya Mafên Mirovan (ÎHD) Eren Keskîn têkildarî mijara berbehs ji ANF’ê re axivî û peyama: ‘’Çapkirina van tîşortan a li ser êşa însanan tiştekî ecêb e’’ da.
‘EV REWŞ JI ŞAXA ME YA ŞIRNEXÊ RE HATE RAGIHANDIN’
Hevseroka ÎHD’ê Eren Keskîn got: ‘’Ji şaxa me ya Şirnexê re hate ragihandin ku şîrketên bi navê Trendyol û Hepsîbûradayê tîşortên bi vî rengî difiroşin. Şaxa me ya Şirnexê jî tavilê ev yek ragihand navenda me ya giştî. Me jî tavilê daxuyaniya hewce da.’’
‘FIROTINA VAN TÎŞORTAN ENCAMA ÎNKARA SÛC E’
Eren Keskîn piştre anî ziman ku li hemberî sûcên ku ji aliyê dewletê ve hatine kirin heya roja îroyîn tim bêcezahiştineke mezin hebûye û destnîşan kir ku bikaranîna Torosên Spî ya bi vî rengî encameke polîtîkaya bêcezahiştinê ye. Eren Keskîn da zanîn ku ev sûc di dema berdewamkirina pêvajoya têkildarî çareseriya pirsgirêka Kurd de hatiye kirin û ev yek anîn ziman: ‘’Ji aliyekî ve îradeya siyasî dibêje ku serdema Torosên Spî serdemeke şaş e lê belê ji aliyê din ve şofêrê sereke yê Torosên Spî Mehmet Agar heya roja îroyîn qet neaxiviye. Aha ev yek polîtîkaya bêcezahiştinê mezin dike û ev yek înkara sûc e. A rastî ev tişta ku tê kirin, ev tîşortên ku tên firotin, encama înkarê ne. Ev tiştên ku rû dane, encama bêcezamana wan sûcan a heya roja îroyîn e ku ji aliyê hêzên dewletê yên tarî û JÎTEM’ê ve hatine kirin.’’
‘BI QASÎ KU BÊCEZAHIŞTIN HEBE EV QAD WÊ TIM VEKIRÎ BE’
Eren Keskîn di dawiya axaftina xwe de diyar kir ku firotina tîşortên ku wêneyên Torosa Spî li ser hene ku sembola bi hezaran cînayetên kiryarnediyar in ya ji aliyê mezintirîn şîrketên danûstandina online ve nîşaneyeke pir xeternak e û ev yek anîn ziman: ‘’Çapkirina van tîşortan a li ser êşa însanan tiştekî pir ecêb e. Weke ÎHD’ê em ê heya dawiyê dev ji vê yekê bernedin. Tişta ku cesaretê dide vê yekê, bêcezahiştin e. Hem serlêdana sûc bikin hem jî ji hemû qadên hewce re serlêdanan bikin. Bi qasî ku bêcezahiştin hebe wê ev qad tim vekirî be; dibe ku tim sûcên bi vî rengî werin kirin. Ji ber ku hem cînayetên kontrgerîla hem jî failên kesên di bin çavan de hatine windakirin heya niha nehatine cezakirin, sûcên bi vî rengî ev qasî bi awayekî hêsan tên kirin.’’
