Bi sedan kes ji şêniyên bajarê Dirbêsiyê yê kantona Cizîrê îro bi xwepêşandanekê komkujiya dewleta Tirk a dagirker li dijî sivîlên li bendava Tişrînê şermezar kirin.
Xwepêşandan ji Qada Jina Azad ber bi xaçerêka Gardînya ve bi rê ket. Beşdaran dirûşmên, “Bijî Berxwedana Hêzên Sûriyeya Demokratîk” û “Berxwedan jiyan e” berz kirin. Her wiha alên Hêzên Sûriyeya Demokratîk (QSD), Yekîneyên Parastina Jin (YPJ) û Hêzên Parastina Civakê hildan.
Girseya gel li xaçerêka Gardînyayê kom bûn. Piştî deqeyeke rêzgirtinê ji bo giyanê şehîdan, ji rêveberên Kongra Star li bajarê Dirbêsiyê Fatima Kalş axaftinek kir û tekez kir ku “Bendava Tişrînê bûye sembola berxwedana li hemberî êrîşên dagirkeriya Tirk. “
Her wiha Fatma got: “Dagirkerî wê nikaribe vîna gel bişkîne, ji ber ku QSD nûnertiya hebûna me dike û YPJ`ê nûnertiya nasnameya me dike. Bi berxwedana gel û kombûna li dora QSD`ê em ê li hember êrişên dagirkeriyê bendeke xurt ava dikin.”
Hevserokê Meclisa bajarê Dirbêsiyê Nûman Erebo tekez kir ku “Berxwedana gelên Bakur û Rojhilatê Sûriyeyê ji ruhê berxwedana Kobanê hatiye ku karibû dagirkeriya dewleta Tirk û çeteyên wê têk bibe û serkeftinê bi dest bixe.”
Erebo her wiha got: “Êrişên dewleta Tirk a dagirker li ser nobedarên li bendava Tişrînê, hewldana şikandina vîna gel û biryardariya wan ya berxwedanê ye. “
Xwepêşandan bi dirûşmeyên dilsoziya bi QSD`ê re bi dawî bû.
