Piştî ku dîmenên DAÎŞ’iyan ên ji girtîgehê hatin derxistin hi medyayê hatin weşandin, nerazîbûneke navneteweyî rû da. The Guardianê ragihand ku di dema şerê navbera artêşa Sûriyeyê û hêzên bi pêşengiya Kurdan de gelek girtiyên DAÎŞ’î hatin berdan û diyar kir ku piştî êrişan QSD’ê kontrola li ser girtîgehan winda kir.
The Nationalê jî berdana bi dehan DAÎŞ’iyan weke ‘metirsîdar’ pênase kir û ragihand ku li Iraqê fikarên ewlekariyê zêde bûn û bangên ji bo xurtkirina tedbîrên li ser xeta sînor zêde bûn.
Deutsche Welle diyar kir ku di dema şerê navbera artêşa Sûriyeyê û QSD’ê de milîtanên DAÎŞ’ê ji girtîgehê reviyan û bi bîr xist ku van kesan berê li Sûriye û Iraqê sûcên giran kirine.
The New York Times jî destnîşan kir ku şerê li derdora girtîgehan diqewimin fikarên cidî li ser ewlekariya herêmê bi xwe re tîne û diyar kir ku li gel îdîayên agirbestê jî tundî nesekinî ye.
PARIS MATCH: ŞARA ÊRIŞ HILBIJART NE MUZAKERE
Li aliyê din kovara Paris Match a Fransî ragihand ku Şara li şûna pêşvebirina muzakereyan êriş hilbijartiye û Fransa jî li hemberî vê yekê bêhelwest maye.
Di nûçeyê de hate gotin, “Serokdewletê Sûriyeyê Ahmed el Şara li şûna pêşvebirina muzakereyan leşker şand. Roja Yekemê bajarê Reqayê ku sembol bû, ji aliyê hêzên hikumetê ve hate bidestxistin û girtiyên DAÎŞ’î hatin berdan. Li aliyê din jî hesta tenêhiştinê heye. Çavkaniyekî Kurd bi hêrs got, ‘Cîhadîst hatin berdan, bila rojnamevan ji Macron û Trump bipirsin bê çi kirine’.
Li gorî çavkaniyên me zêde tiştek nekirin. 7’ê Çileyê di civîna dawî ya têkildarî Sûriyeyê li Parîsê hate lidarxistin, operasyoneke leşkerî ya li dijî Kurdan nebû mijara gotinê. Çavkaniyekî dîplomatîk dibêje, ‘Şeraa careke din nîşan da ku divê mirov guh nede gotinên wî’.”
