Platforma Azadî û Aştiyê ya Ewropayê (EFFP), ji bo daxwaza rakirina astengiyên li pêşiya Rêber Apo ku vîzyona xwe ya siberojê bi cîhanê re parve bike, bi navê “Ez dixwazim bi Ocalan re hevdîtinê bikim” kampanyayek da destpêkirin. Di çarçoveya hevdîtinê de wê serlêdan li Wezareta Edaletê ya Tirkiyeyê were kirin. Her wiha peyamên bi dîmen ên ji bo belavkirina di medyaya dijîtal de werin rêkirin.
Di çarçoveya kampanyayê de akademîsyen, hunermend, siyasetmedar, rojnamevan, hiqûqnas, rûspî, parêzvanên mafên mirovan, aktivîst û kesên ji beşên cuda ên raya giştî ya navneteweyî serlêdanekî fermî li Wezareta Edaletê ya Tirkiyeyê bikin.
Endama Koordînasyona EFFP’ê Prof Neşe Ozgun der barê kampanyayê de pirsên ANF’ê bersivand.
PLATFORMA AZADÎ Û AŞTIYÊ
Neşe Ozgun diyar kir ku Platforma Azadî û Aştiyê 6 sal in xebatê dike û got ku nêzî 300 pêkhateyên wan heye. Ozgen bilêv kir ku ew polîtîkayeke nû ya diasporayê pêş dixin û wiha got: “Em ne tenê bi bûyerên li Tirkiye û Kurdistanê re bi mafên sirgûnê yên li Ewropayê û di heman demê de bi polîtîkaya demokrat a li vir re eleqeder in. Yanî em hewl didin polîtîkayên Tirkiye û Kurdistanê û yên li vir bikin yek.”
‘EM DIXWAZIN TÊKOŞÎNA AŞTÎ Û DEMOKRASIYÊ PÊŞ BIXIN’
Ozgen bilêv kir ku ew pêşengiya kampanyaya “Ez dixwazim bi Abdullah Ocalan re hevdîtinê bikim” dikin û got ku komên European Leftve The Left of the European Parliament ên li Ewropayê piştgiriya kampanyayê dikin. Ozgen destnîşan kir ku ew dixwazin têkoşîna aştî, azadî û demokrasiyê pêş bixin û wiha got: “Em dixwazin binê van têgehan tijî bikin. Aştî çi ye? Azadî çi ye? Demokrasî ji bo kuderê? Em demokrasiyekî çawa dixwazin?”
‘ARMANCA SEREKE YA KAMPANYAYÊ AZADIYA OCALAN E’
Ozgen anî ziman ku armanca sereke ya kampanyayê azadiya Ocalan e û got ku ne tenê navên têne naskirin armanc dikin ku hemû beşên civakê ji bo hevdîtina bi Rêber Apo re serlêdanê bikin. Ozgen sedema kampanyayê bi gotina, “Em qala tecrîdekî giran ya 26 salan dikin” rave kir û diyar kir ku divê gel di nava pêvajoya çareseriyê de be ku li Tirkiyeyê dewam dike.
Ozgen bi bîr xist ku hevdîtinên aştiyê di navbera du aliyan de dewam dike û wiha got: “Em tenê dengê alîyekî dibihîzin. Em dengê desthilatdarî û dewletê dibihîzin. Mafê ragihandina dengê Ocalan û Tevgera Azadiya Kurd ji wan bixwe tê desteserkirin. Ozgen destnîşan kir ku banga 27’ê Sibatê ne tenê agirbest û berdana çekan e û diyar kir ku ew vê bangê wekî meseleya demokrasiyê dibîne.”
‘EGER YEK JI ME DI HEPSÊ DE BE EM HEMÛ DI HEPSÊ DE NE’
Ozgen pirsa, “Gelo di vê meseleya demokrasiyê de gel rastiyê ji ku derê hîn bibe?” kir û wiha got: “Ji nav me kesekî girtiyê siyasî be, ji mafên xwe yên nivîsandin û axaftinê bêpar be, kesek bêheq di girtîgehê de be, ev tê wateya ku em hemû di hepsê de ne. Tê wateya ku em hemû bê gotin dimînin, ji siyasetê vedikişin û nikarin avaniyekî siyasî ava bikin.”
Ozgen ragihand ku wan hashtaga “VisitOcalan” vekirine, lê ev ne tenê kampanyayekî hashtagê ye û armanc dikin ku ev mijar her di rojevê de be. Ozgen diyar kir ku kampanya bi koma wan re destpê kiriye lê bi demê re nêzî 300 pêkhateyên wan jî beşdar bibin û der barê xebatên xwe yên pêvajoya pêş ev agahî dan: “Em ê di 5’ê Tîrmehê de dîsa telekonferansekî mezin bikin. Însîyatîfên aştiyê yên cuda ên li Tirkiyeyê, aliyên hewldana civakî ya ji bo aştiyê ji bo avakirina meclîsekî dest bi xebatan kirin. Eleqeya vê bi kampanyayê re heye. Ne tenê partiyên siyasî yên ku koma wan li meclîsê heye aliyên cuda jî têkildarî vê pêvajoyê nêrînên erênî didin. Li Tirkiyeyê di 15’ê Hezîranê de konferansekî mezin were lidarxistin. Her wiha bi heman awayî di meha Îlonê de ji bo girîngiya tevgera demokrasiyê li bajarekî Ewropayê konferansekî mezin were lidarxistin. Li Tirkiyeyê bi hemwextî li çend navendan konferans werin lidarxistin û ev konferans hemû bi rêya Zoomê girêdayî hev bin. Em ê bi van konferansan re hemû aktorên têkildarî vê meseleyê yên hem derveyî welat hem jî li welat bidin axaftin.”
‘HEMÛ BEŞÊN CIVAKÊ WÊ TEVLÎ BIBIN’
Ozgen got ku di qonaxa ewil a kampanyayê de navên têne nasîn wê tevlî bibin û anî ziman ku ew li bendê ne ku di tevahiya mehên havînê de hemû aliyên civakê tevlî bibin û wiha berdewam kir: “Di qonaxa duyemîn a kampanyayê de em dixwazin rasterast serlêdana Wezareta Edaletê bikin û ne tenê fîgûrên siyasî, akademîsyen û rojnamevan em dixwazin serlêdana hemû kesên ku dixwazin bibin kirdeya aştî û demokrasiyê pêk bînin.”
‘EM BANGA SERLÊDANA JI BO ÎMRALIYÊ DIKIN’
Neşe Ozgen herî dawî têkildarî kampanyayê ev peyam da; “Hevdîtina rasterast a bi girtiyekî siyasî re mafê bingehîn e. Em dixwazin ji bo civaka Tirkiyeyê avaniyekî siyasî ya heqîqî ava bikin. Ji bo afirandina çarenûsa jinûve bûyîna civak, bang li her kesê dikin ku piştgirî bidin vê kampanyayê û serlêdana Wezareta Edaletê bikin.”
