Şêniyên Girkê Legê, Çilaxa û Til Koçerê soza şopandina têkoşînê heta pêkanîna azadiya fîzîkî ya Rêber Abdullah Ocalan û piştgiriya tevahî însiyatîfên pêkanîna aştiyê, dubare kir.
Bi hezaran şêniyên ji bajarên Girkê Legê, Çilaxa, Rimêlan û Til Koçerê li Qada Şehîd Xebat a li rojhilatê bajarê Girkê Legê kom bûn, wêneyên Rêber Apo û dirûşmên “Bê Serok Jiyan Nabe” û”Azadiya Rêber Apo azadiya me ye” berz kirin.
Çalakiya girseyî ku bi dirûşma “Em ê roja reş bikin roja azadiya Rêber Apo” hat lidarxistin,bi deqeyeke rêzgirtinê dest pê kir.
Dûre rêvebera Kongra Star Şîraz Hemo axivî û got: “Rêber Abdullah Ocalan jiyana xwe di oxira doza gelê Kurd û pêkanîna azadiya gelên di siyasetên mêtingerî û çewisandinê re derbas bûne de, derbas kir.”
Şîraz wiha domand: “Îro dem hatiye ku em sînorekê ji van siyasetan re deynin. Em baş dizanin ku li gel Rêber Abdullah Ocalan çareserî ji van pirsgirêkên li herêmê re hene. Em li vir soza xwe ya piştgiriya ji tevahî însiyatîfên ji bo aştiyê tên lidarxistin re nû dikin û em ê têkoşîna xwe heta pêkanîna azadiya fîzîkî ya Rêbertî bilind bikin.”
Her wiha endamê Meclisa Bajarê Girkê Legê Ebdurezaq El Salim jî got: “Bi hezaran ji pêkhateyên herêmê ji Kurd, Ereb û Suryan ji bo daxwaza pêkanîna azadiya Rêbertî li vir kom bûne. Ev kombûn ji bo civata navneteweyî peyamek e ku heya pêkanîna azadiya Rêbertî û wergirtina mafên me yên rewa têkoşîna xwe didomînin.”
Ebdurezaq di dawiyê de got komploya ku di şexsê Rêber Apo de gelên herêmê hedef girtiye de têk çû, ji ber ku bi milyonan gelên cîhanê xwedî li fikra Rêber Abdullah Ocalan a demokratîk derketin.
