Federasyona Gaziyên Bakur û Rojhilatê Sûriyeyê bi wesîleya Newrozê daxuyaniyeke nivîskî weşand.
Daxuyanî bi vî rengî ye:
“Em Newroza roja nû di serî de li pêşengê gelan Rêber Apo, tevahî şervanên azadiyê û gelên me yên berxwedêr pîroz dikin.
Newroz, roja nû ya gelê Kurd û bihara gelên Rojhilata Navîn e. Cejna Newrozê demsala biharê bi xwe re geş û xweş dike, Newroz cejna xwezayê, hevgirtin û yekîtiya gelan e. Bi Newrozê re Kawayê Hesinkar textê zaliman hilweşand û bi agirê geş kir tevahiya Rojhilata Navîn rohnî kir, vîna gelan yekpare kir. Ji Kawayê Hesinkar heya Kawayê Hemdem Mazlûm Dogan têkoşîna wekhevî, edalet, xwişk û biratiya gelan berdewam dike. Îro jî li çar parçeyên Kurdistanê têkoşîna gelê Kurd di pêşengtiya Rêber Apo didome û roj bi roj nêzî serketinê dibe.
Gelê Kurd ê bi salan e ji bo azadiya xwe di nav têkoşîneke mezin de ye, helwest û sekna xwe ya li hember dijmanan bi taybetî di cejn û şahiyên Newrozê de nîşanî dost û dijminan dide. Rêber Apo jî di rojeke Newrozê de hîmên têkoşîna azadiyê ya bi salan e didome danîn.
Gelê Newrozê gelê Kurd îro bi gelên cîran ên Ereb, Asurî, Ermenî û hwd. re bi şoreşa Bakur û Rojhilatê Sûriyeyê ji bo jiyaneke azad û wekhev di nav berxwedanê de ye. Ev şoreş bi berdêlên mezin li ser esasê azadiya jinan bi germahiya agirê Newrozê, Rojhilata Navîn û cîhanê rohnî dike.
Gelê Kurd û dostên wan bi coş û heyecaneke mezin bi peyama Rêber Apo li qadan e, li ber xwe didin û sozdariya xwe ya bi Rêbertiyê re didin nîşandan. Bi vê wesîleyê em berxwedana bi rûmet a gelan silav dikin.
Weke Federasyona Gaziyên Bakur û Rojhilatê Sûriyeyê em bang li gelên xwe dikin ku Newroza îsal bikin azadiya fizîkî ya Rêber Apo û tevahî gelan. Di şexsê şehîdên Newrozê heval Mazlûm Dogan, Zekiye Alkan, Rahşan Demîrel, Bêrîvan, Ronahî û Sema Yuce de em hemû şehîdên azadiyê bi bîr tînin. Ji bo pêkanîna armanc û hêviyên şehîdan weke gaziyên şer em timî amade ne her cure berdêlan bidin.”
