Fikrî Tûglûk ê di meha Sibata 1997’an de dema xwendekarê Zanîngeha Mêrsînê bû hatibû binçavkirin û li Dadgeha Ewlekariya Dewletê (DGM) hatibû darizandin, bi cezayê muebedê hatibû cezakirin. Piştî 29 sal girtîgehê, Tûglûk azad bû û li bajaroka Girêsira ya Êlihê bi coşeke mezin hat pêşwazîkirin. Di merasîma pêşwaziyê de nûnerên partiyên siyasî, saziyên civaka sivîl, malbata Tûglûk û gelek welatî amade bûn.
Tûglûk li vir axaftineke kurt kir û got: “Hatina vir, bi gelê me re bi hev re bûn hestek pir xweş e, lê ji ber ku bi hezaran hevalên me di girtîgehan de ne, em xemgînin. Heta ku em kêm bin, em ê azad nebin. Lê moralên hevalên me gelekî baş in, em li benda rojên ku ew jî azad bibin in. Û şahiya me ya esasî jî dema ew bên em ê pîroz bikin.”
Piştre Tûglûk çû mala xwe ya li Taxa Çayê û li wir bi çepik, tîlîlî û dirûşma “Bijî berxwedana zindanan” hat pêşwazîkirin.
FIKRÎ TÛGLÛK KÎ YE?
Fikrî Tugluk, di Çileya 1997’an de dema xwendekarê Beşa Hesabgiriyê ya Zanîngeha Mêrsînê bû, hatibû binçavkirin û li Dadgeha Ewlekariya Dewletê (DGM) hatibû darizandin, bi cezayê muebedê hatibû cezakirin. Tugluk bi rêzê li girtîgehên Êlih (Batman), navçeya Xelatê ya Bedlîsê, Trabzon û Girtîgeha Ewlekariya Bilind a Hejmara 1 a Amedê mabû û piştî 29 salan hate berdan.
