Di çarçoveya şermezarkirina êriş û komkujiyên çeteyên hikumeta demkî yên bi piştgiriya dewleta Tirk li dijî taxên Şêxmeqsûd, Eşrefiyê û Benî Zêd yên Helebê û destekdayîna berxwedana gel wan taxan çalakî hatin lidarxistin û daxuyanî hatin xwendin.
Gelê Efrînê yê ku di 2018’an de li Efrînê rastî komkujî û qirkirina dewleta Tirk a dagirker û çeteyên wê hat û koçber bû, di sala 2024’an de ji Şehbayê koçî bajarê Qamişloyê yê kantona Cizîrê ya Bakur û Rojhilatê Sûriyê bû, ji bo piştgiriya Şêxmeqsûd û Eşrefiyê daketin kolalan. Gel li pêşiya Baxê Giştî û Navenda Çand û Hunerê ya Mihemed Şêxo kom bû. Ji wir meşiya heta Çerxerêya Şehîdan a li Sûkê û dîsa li ber Navenda Çand û Hunerê ya Mihemed Şêxo kom bûne.
Gel bi yek dengî diruşma “Bijî berxwedana Şêxmeqsûd û Eşrefiyê”, “Bijî berxwedana Hêzên Parastina Efrînê, Hêzên Parastina Şêxmeqsûd û Eşrefiyê” berz kirin.
Her wiha got: “Şêxmeqsûd û Eşrefiyê azad in, Colanî û DAIŞ yek in”.
Çalakî didome, gel banga beşdarbûna çalakiyê dike.
GIRKÊ LEGÊ
Gelê bajêr ji pêş Mizgefta Elî Bin Ebî Talib meşiya û tev li bajêr geriya. Li Qada Şehîd Xebat meş veguherî mitîngê li wir endama rêveberiya Partiya Yekitiya Demokratîk (PYD) a kantona Cizîrê Ayhan Murad axivî. Murad da zanîn li gel peyman û lihevkirinên heyî êriş û komkujyên li ser gelê taxên Şêxmeqsûd, Eşrefiyê û Benî Zêd ên Helebê didomin. Wê tevgera gel heta têkbirina van sûcan raneweste.
Xwepêşandan bi diruşmên berdewama berxwedanê û şehîd namirin bi dawî bû.
DÊRIK
Bi dehan keç û xortên bajêr bi daxuyaniyekê seferberî ji bo piştgiriya berxwedana Hêzên Ewlekariya Hundirîn û gelê Şêxmeqsûd, Eşrefiyê û Benî Zêd ragihand. Daxuyanî li pêş Navenda Şehîd Bawer a Tevgera Ciwanên Şoreşger a Sûriyeyê hat dayîn.
Di daxuyaniyê de hat destnîşankirin ku berxwedana Şêxmeqsûd, Eşrefiyê û Benî Zêd parastina herêmê û rûmeta gel temsîl dike.
Ciwanan di daxuyaniya xwe de diyar kir ku ew ji bo hevgirtina bi gelê Şêxmeqsûd, Eşrefiyê û Benî Zêd re seferberiyê îlan dikin, girêdana we bi xakê û parastina gel re diyar dikin û nahêlin çete û xayîn taxên Helebê kontrol bikin.
Di dawiyê de hat gotin ku ruhê Kobanê û Bendavê Tişrînê bi ser xistiye wê Şêxmeqsûd, Eşrefiyê û Benî Zêd bi ser bixe.
EYN ÎSA
Tevgera Ciwanên Şoreşger û koçberên Girê Spî li Qada Kampa Girê Spî ya bajarê Eyn îsayê daxuyaniyek ji bo şermezarkirina êrişên dijî taxên Helebê û destekdayîna berxwedana gel da.
Endamê Tevgera Ciwanan Mehmûd El Omer daxuyanî xwend.
Di daxuyaniyê de êrişên li dijî taxên Eşrefiyê, Şêxmeqsûd û Benî Zêd ku di encamê de bi dehan welatî şehîd bûn û birîndar bûn û bi sedan koçber bûn, hatin şermezarkirin. Her wiha berxwedana gel û Hêzên Ewlekariya Hundirîn li dijî hovan hat silavkirin.
