Ji 10’ê Nîsanê ve ye ji aliyê Iraqê ve ambargoyeke girankirî li ser Wargeha Penaberan a Şehîd Rûstem Cûdî (Mexmûr) tê meşandin. Girêdayî vê yekê şandeya ku ji rêveberên wargehê pêk tên ji bo çareserkirina pirsgirêkên wargehê di 14’ê Gulanê de seredana Bexdayê kiribû, piştî hevdîtina bi Wezîrê Edaletê re di vegerê de hin endamên şandeyê ji aliyê hikûmeta Iraqê ve hatin binçavkirin.
Ji bo çareserkirina pirsgirêkên wargehê û berdana endamên şandeyê, şêniyên Wargeha Şehîd Rûstem Cûdî (Mexmûr) meşeke girseyî li dar xistin.
Meşê li ber avahiya Saziya Malbatên Şehîdan a Wargehê dest pê kir û heta li ber Ofîsa Neteweyên Yekbûyî (NY) dewam kir. Di meşê de posterên Rêber Apo, alên KJK’ê hatin hildan. Her wiha dirûşmeyên “Bijî berxwedana Mexmûrê”, “Bijî Serok Apo” û “Bimire Xiyanet” hatin berzkirin.
Piştî ku meşvan gihîştin li ber Ofîsa NY’ê, li vir daxuyaniyek hate dayîn. Beriya ku daxuyanî were dayîn, ji bo tevahiya şehîdên Tevgera Azadiya Kurdistanê deqeyekê rêz hate girtin. Piştî rêzgirtinê jî ji aliyê Hevseroka Meclîsa Gel a Mexmûrê Filîz Bûdak ve daxuyaniyek hate dayîn.
Filîz Bûdak di destpêka axaftina xwe de diyar kir ku ew weke gelê Apoyî, xwedî li mîrayeta berxwedana dîrokî ya şehîd Mazlûm Dogan ku gotibû; “Berxwedan Jiyan e” derdikevin û wiha got: “ “Me xelkê Mexmûrê li hemberî vê zilm û dagirkeriya dewleta Tirk û dewletên dagirker me serî netewand, teslîmiyet qebûl nekir û ji ber wê em ketin ser rêya penaberiyê. Di pêvajoya 30 salî de li hemberî polîtîkayên PDK’ê, dagirkeriya dewleta Tirk û zilm û zordariya dewleta Iraqê me ti carî serî netewand û teslîmiyet qebûl nekir. Em li ser vê xaka biyanî weke penaber dijîn. Me her tim hewl da ku bi têkoşîn û bi kesayeta mirovperwer bijîn û li derdora xwe bidin jiyankirin. Ji ber vê yekê di dirêjiya 30 salî de me li ser xaka ku em lê dijîn her tim bi peywendiyên mirovahî, aştiyane û aramî dane avakirin. Em ji bo wan bûn çavkaniya jiyanek mînak û birûmet û di bedela parastina xaka wan de me şehîd dane.”
Bi domdarî Filîz Bûdak ev yek anîn ziman: “Di vê pêvajoya de ku behsa aşitî û demokrasiyê tê kirin, hikûmeta Iraqê di ecama hevdîtina navbera Erdogan û Sudanî de zextên xwe yên li ser wargehê zêdetir kirine. Ev yek nayên qebûlkirin. Madem xwe weke berpirsê penaberan dibîne wê demê neçar e ku xwedî li vê wargehê derbikeve. Hikûmeta Iraqê neçar e ku erk û berpirsiyariyên xwe yên li hemberî vê civakê bi cih bîne. Nûnekirina nasnameyên wargehê, nevekirina rêya perwerdeyê ya ji bo xwendevanên me û rênedayîna karkaren nayê qebûlkirin ev yek ne yasayî ne ne jî mirovî.Pêwîst e dewleta Iraqê dev ji polîtîkayên xwe yên li ser wargehê berde.”
Filîz Budak diyar kir ku ew weke gelê Kurd piştgirî didin hevrebûn, xwişk û biratiya gelan û wiha bi axaaftina xwe bi dawî kir: “Di avêtina vê pêngavê de nabe ku hikûmeta Iraqê zextên wisa li ser wargehê pêk bîne. Girêdayî vê yekê divê hikûmeta Iraqê rêzê li îradeya gel bigire. Berpirsiyarên wargehê jî dev ji polîtîkayên xwe yên şaş berdin.”
