Rejîma Îranê derengiya şevê kampa Komeleya Zehmetkêşan, gundê Zirguwêz ên Silêmaniyê û balafirgeha Herîr a Hewlêrê bombebaran kirin.
Şerê ku di navbera Îsraîl-Emerîka û Îranê de di 28’ê Sibatê de dest pê kir, her diçe berfirehtir û dijwartir dibe. Di heman çarçoveyê de duh bi şev gelek deverên li Herêma Kurdistan û Iraqê hatin bombebarankirin.
Rejîma Îranê di saetê derengiya şevê de êrîşê kampa Komeleya Zehmetkêşan a Kurdistanê ya li Surdaş a ser bi parêzgeha Silêmaniyê kir. Di encama êrîşê de şewat di kabîneyek ya li kampê de derket.
Komeleya Zehmetkêşan a Kurdistanê, ragihand ku di encama êrîşê de tu ziyanên canî çênebûn.
Her wiha derengiya şevê gundê Zirguwêz yê ser bi sînorê Silêmaniyê, bi rêya balafirek bêmirov û biçek ve hate bombebarankirin. Li gorî agahiyan ku welatiyên li herêmê ragihandine, li sînor dengê çar teqînên mezin hatine bihîstin.
Heta niha tu aliyên ewlekariyê yên Silêmaniyê têkildarî zirar û ziyanên êrîşê her wiha aliyê êrîş pêkaniyî de, daxuyanî nedane.
BALAFIRGEHA HERÎR HAT HEDEF GIRTIN
Li gorî agahiyên hatine parvekirin, derengiya şeva bihurî balafirgeha Herîr a dikeve sînorê bajarê Hewlêrê ku baregeha hêzên Hevpeymaniyê lê ye, hate bombebarankirin.
Her wiha di saetên zu yên sibehê de jî li nêzîkî balafirgeha leşkerî ya Herîr dengê teqînek bihêz li asîmanê Hewlêr, hat bihîstin.
Gorî agahiyên ji çavkaniyên herêmê hatîn girtin, bi rêya dronekê êrîşê balafirgehê hatiye kirin, lê ji aliyê sîstema parastina Hevpeymaniyê ve hate têkbirin.
Piştî êrîşên DYE û Îsraîlê yên li dijî Îranê, êrîşên Îranê yên li seranserî Îraqê û Herêma Başûrê Kurdistanê berdewam in. Rejîma Îranê, li Başûrê Kurdistanê baregeh û kampên partiyên ji Rojhilatê Kurdistanê bombebaran dike.
Li Îraqê, hat ragihandin ku hin baregeh û nuqteyên girêdayî Heşdî Şebî hatine hedef girtin û hejmareke mezin windahî di êrîşan de çêbûne.
