Ji gerîlayên Kurdistanê Şoreş Serhed, bi wesileya 47’emîn salvegera damezrandina PKK’ê ji ANF’ê re axivî.
Şoreş Serhed diyar kir ku salvegera îsal ji hemû salan girîngtir û watedartir dibînin û anî ziman ku piştî 47 salên têkoşînê ên bi serkeftinên mezin a PKK’ê, em bi pêvajoya Civaka Demokratîk û Aşitiyê yak u Rêber Apo da destpê kirin re derbasî qonaxeke nû bûne.
Gerîla Şoreş Serhat salvegera 47’emîn a PKK’ê li herkesî pîroz kir û wiha anî ziman: “Navê min Şoreş Serhed e. Ez salvegera 47’emîn a PKK’ê di serî de li Rêber Apo, bi taybetî şehîdên me yên qehreman, gelê me yê welatparêz, hemû gelên Kurdistanê, gelên enternasyonalîst, hemû hevalên me yên di zindanan de û hevalên me yên ku li çiyayan li dijî dagirkeriyê li ber xwe didin pîroz dikim. Li ser vê bingehê, ji bo me pîrozkirina salvegera 47’emîn a PKK’ê, ji salên berê girîngtir e, divê mezintir û bi qîmettir were pîrozkirin. Bi taybetî jî bi pêvajoya Aştî û Civaka Demokratîk a ku ji hêla Rêber Apo ve hatiye destpêkirin re li ser bingeha nirx û bîranînên ku bi keda têkoşîna salan a PKK’ê û şehîdên me hatine avakirin, xwedî li PKK’ê derketin û vê rojê pîrozkirin ji bo me gelekî watedar e.
Rêber Apo piştî têkoşîna 47 salan a PKK’ê ku bi serketinên mezin meşand, îsal pêvajoya Aştî û Civaka Demokratîk da destpêkirin. Bi vê yekê re em derbasî qonaxek nû bûn. Li ser vê bingehê, têkoşîna li ser bingeha tecrûbeyên PKK’ê, rêbazên PKK’ê û nirxên PKK’ê tê meşandin, wekî ku Rêber Apo jî diyar kir PKK’ê hebûna Kurdan danî holê. Em ê jî li ser vê bingehê, têkoşîna azadiya Kurdistanê û gelên bindest bimeşînin. Ev pêvajoya heyî li ser van nirxan PKK’ê di dilê xwe de, ruh û mejiyê xwe de ji nû ve vejandin û mezinkirina têkoşînê ji bo me esas e.”
Şoreş Serhed bal kişand ku li ser tecrûbe û nirxên PKK’ê, têkoşînê di dil, rûh û aqil de ji nû ve bi jiyan û mezinkirin esas e û got, “Bi taybetî min bi xwe jî dema ku di nava PKK’ê de derbas kir û pratîka danî holê, ji nirxên nava PKK’ê bi bandor bûm. PKK’ê ruhê Apoyî, jiyana Apoyî, sosyalîst û komunal di me de ava kir. Wekî ku Rêber Apo pênase kir, PKK di dema qirkirin û dagirkeriya li Kurdistanê de derket ser dika dîrokê. Ji roja ku PKK derket holê û vir ve, PKK bi têkoşîna Apoyî ya 52 salan û têkoşîna partiyê ya 47 salan têkoşînek bênhempa û bêwestan meşand. Li ser vê têkoşînê nirxên bêhempa û gelekî mezin ava kir. Li ser van nirxan îro tevahiya Kurdistan û cîhan li Rêber Apo temaşe dikin. Rêber Apo têkoşînek mezin meşand. Êdî di têkoşînê de guhertinek çêkiriye. Bi vê yekê re têkoşîn wê ji her demê xurttir, çêtir, nûtir û serketîtir berdewam bike. Em di wê baweriyê de ne ku bi vê pêvajoya nû re, em ê heta dawiyê li mîrasa ku PKK’ê hiştiye derkevin, bi serketinên nû re nirx û ruhê PKK’ê di şexsê xwe de bi afirînin û di bîranîna şehîdên xwe de û di tevahiya dîroka Kurdistanê de serketina Kurdistanê misoger bikin. Helwest û biryardariya me li ser vê bingehê ye.”
WÊ JIYANA KU PKK AVAKIR BIDOME
Gerîla Şoreş Serhed, ji bo şervanên Apoyî yên ku felsefeya Rêber Apo dijîn û ji bo wê têdikoşin, mijara herî girîng wiha anî ziman: “Ez xala herî girîng a ji bo şervanên Apoyî yên ku ji bo felsefeya Rêber Apo dijîn û têdikoşin, bînim ziman. Dema ku behsa PKK’ê tê kirin, edalet, wekhevî, jiyana exlaqî û polîtîk tê hişê me. Wekî her milîtanekî Apoyî, ev jiyana efsûnî ya me ceriband bû nesîbê me. Ev jiyana Apoyî ku bi navê PKK’ê xwe dide nasîn û bîranînên ku neyên jibîrkirin hene û me jiyana PKK’ê ya ku bi rêbaza jiyanê xwe xweperwerde kir, jiyan. Nêzîkatiya PKK’ê ya ji bo jinê, xweza, jiyana azad û wekhev û felsefeya Rêber Apo ku di şexsê PKK’ê de cih girtiye, di her şaneya hebûna me û ruhê me de cihê xwe girtiye. Her çendî PKK hatibe fesixkirin jî û rêbazên PKK’ê yên têkoşînê guherîbin jî, jiyana PKK’ê û nirxên wekhevî, maf, hiqûq, edalet ku di nav civakê de ava kiriye wê her tim di ruhê me de diherike û wê her tim berdewam bike. Ev jiyan wê bi civaka demokratîk xurttir bibe. Em ê jiyana wekhev, azad, azadîxwaziya jinê û ekolojîk mezintir bikin û bidomînin.”
