Gerîlayên Azadiyê yên Kurdistanê Newroza aştî û azadiyê ya gelan pîroz kirin.
Ji gerîlayên HPG’ê Zîlan Sipêrtî û Gernas Xorasan Newroza gelên Kurdistanê pîroz kirin û hestên xwe parve kirin. Gerîlayan diyar kirin ku ev Newroz Newroza Rêber Apo ye ku kir ewqasî bi coş be.
‘EM HÊVIYA XWE MEZIN DIKIN, XWE JI NÛ VE DIAFIRÎNIN’
Zîlan Sipêrtî: Em Newrozê li Rêber Apo, şehîdan, berxwedêrên li zindanan, gelê me û hemû hevrêyên me, li her kesên ku dengê xwe li dijî zilmê bilind dikin, pîroz dikin. Bi taybetî di nameya Rêber Apo de ku ji me re şand, gaveke nû, kelecan û moraleke nû afirî. Ji ber vê yekê jî Newroza îsal ji bo me gelekî cuda û bedew e. Wekeg erîlayên YJA Starê moral, kelecana me gelekî cuda û zêde ye.
Peyama Rêbertî li her derê deng veda û berxwedan mezin kir. Bi taybetî gelê me li sûrên Amedê bi berxwedana xwe ev yek nîşan da. Ev yek nîşaneya dengvedana peyama Rêbertî bû. Li warê Mazlûm Dogan, li gelek deveran pîrozbahî hatin kirin. Weke hêzên YJA Starê em jî bi vê moralê xwe ji nû ve diafirînin.
Xwedîderketina li fikrên Rêbretî, bi dirûşma ‘Bijî Serok Apo’ ji nû ve afirandina xwe bi rastî jî cihê kelecanê ye. Bi taybetî pîrozbahiyên bi pêşengiya jinan têne kirin gelekî bi wate ne. Nameya Rêbertî li her derê hate xwendin, pêvajo nû bû û bi taybetî dayikên me berxwedan hîn mezin kir. Gelê me kete nava pêvajoya ji nû ve avakirina xwe. Nûbûna her Newrozê ji bo me cuda ye; ev Newroz jî ji yên din cuda ye. Ji ber ku nameya Rêber Apo li tevahiya cîhanê hate xwendin. Li her derê, li her qadê gelê Kurd li hev kom bû, rabû ser piyan û xwedî li destketiyan derket.
Ev hemû bi fikrên Rêber Apo bûn; gelêw Kurd bû xwedî îrade, hay ji xwe çêbû, bi azadiyê hesiya û niha jî vê yekê li qadan pîroz dike. Em di nava gelê xwe de nînin, lê em hîs dikin, dişopînin û hêviya xwe mezin dikin. Di sala 2026’an de ji bo bi Rêber Apo û gelê xwe re li sûrên Amedê Newrozê pîroz bikin, em hêviyê mezin dikin.
‘EM COŞA NEWROZÊ YA GELÊ XWE HÎS DIKIN’
Gernas Horasan: Newroza Azadiyê li Rêber Apo, li şehîdên heqîqetê û gelê me yê berxwedêr pîroz dikim. Gelê Arî bi salan e bi vê kevneşopiyê Newrozê pîroz dike; wateya xwe ya dîrokî mezin e. Eşkere ye ku Newroza 2025’an ji yên derbasbûyî gelekî cuda ye.
Bi taybetî li her devera Kurdistanê ev coş û kelecan tê hîskirin. Pîrozbahiyên li Bakurêw Kurdistanê, li Licê, Sûrê, Rojhilatê Kurdistanê; yekîtiya gelê Kurd hate destnîşankirin. Bi salan xwestin zerarê bidin kevneşopî û yekîtiya gelê Kurd, xwestin çanda me tine bikin. Lê belê bi parastina çanda xwe, bi parastina Kurd û Kurdisatnê û xwedîderketina li çanda gelê Arî ev gef hatin têkbirin û êrîş hatin beralîkirin.
Xeyaleke Rêberê me hebû û em ê vê xeyalê pêk bînin. Rêberê me di nava her şert û mercî û zehmetiyê de bi berxwedanê ev destketî afirand. Kurd êdî hay ji xwe heye, zane ye. Dozeke xwe ya azadiyê heye. Gelekî bi şeref û bi rûmet e, çand û berxwedana xwe diparêze û wê biparêze. Dibe ku em ne di nava gelê xwe de bin lê belê gelekî bi kelecan û bi coş in. Ev coş û kelecan dengvedana Rêber Apo ya li nava gelê Kurd û pêvajoyê ye.
Em îro dibînin ku daxwaza azadiya Rêber Apo ya gelên bindest û hemû gelên têkoşer hîn xurt bûye. Azadî wê pêk were, em ê bi Reber Apo re Newrozê li sûrên Amedê pîroz bikin. Bi vê baweriyê em têkoşîna xwe mezin dikin û dewam dikin.
