Jinên ku bi salan rastî tacîz û tecawizê tên, bi yekgirtina fikrê azad ve li dora hevdu kom bûn; bêyî ku zor û zehmetiyan nas bikin, jiyanê werdigerînin qada têkoşînê. Li hemberî serdestiya ku tê ferzkirin, di heman xalê de dibin rêheval û di azadiyê de bi armanc in. Ji ber vê sedemê, li şûna rojekê, her roj bi jina azad re jiyan bi nirx û xwedî wate ye. 8’ê Adarê li gel fikrên Rêber Apo ji her demê zêdetir wateya xwe kûrtir dike. Bi taybetî silav û nirxandinên ku Rêber Apo bo tevahî jinan kiriye, cihê îlham û moralê ye. Hêzên YJA Starê jî bi sekn û têkoşîna xwe 8’ê Adarê pêşwazî dikin. Pîrozbahiya ku li qadên azad tên lidarixistin, bo hemû jinên cîhanê dibe diyariya azadiyê.
Bi boneya 8’ê Adarê, gerîlayên YJA Starê ji me re axivîn, hest û nêrînên xwe parve kirin. Gerîlaya YJA Star Bêrîtan Botan ji bo 8’ê Adarê hestên xwe bi vî awayî anîn ziman û got: “8’ê Adarê li Rêber Apo û tevahî jinên têkoşer û şoreşger pîroz dikim. 8’ê Adarê ya sala 2026’an ji salên din cudatir e. Ji ber ku me deng û perspektîfên Rêber Apo girtin. Ev perspektîf ji bo me peyamên azadiyê bûn; em ê bi vê yekê têkoşîna xwe bilindtir bikin.”
Bêrîtan Botan piştre bal kişand ser asta êrîşên ku li ser jinan tên meşandin û ev yek anîn ziman: “Di her warî de êrîş li ser jinan tên meşandin; pergal dixwaze ku jinan bixe bin xizmeta xwe û wan bêdeng bike. Em wek jinên têkoşer dixwazin ku li beramberî vê zihniyetê bibin dengê têkoşîn û berxwedanê. Bêguman her kesê ku peyama Rêber Apo girt, ji bo xwe wergerand peyama têkoşînê. Em vê yekê jî di asta têkoşîn û rabûna jinan de dibînin. Li ser vê bingehê, em bi hev re li ser bingeha fikrê azad kom bibin û dengê xwe bilindtir bikin.”
Gerîlaya YJA Starê Bêrîtan Botan di dawiya axaftina xwe de bal kişand ser rol û misyona jinên Başûrê Kurdistanê û got: “Li hemberî sîstema ku li Başûrê Kurdistanê tê meşandin, bi taybetî li dijî biçûkxistina jinan serî hildin û tu carî deriyê xwe ji pergala heyî re venekin. Bi kampanya ‘Dem Dema Jinan e’ em li dora hevdu kom bibin û bi hev re bibin dengê azadiyê. Careke din roja têkoşînê li hemû jinên cîhanê pîroz dikin û li gel azadiya fîzîkî ya Rêber Apo em ê rêya têkoşîna xwe dewam bikin.”
‘EM Ê LI GEL RÊBERTIYA AZAD BIGIHÊJIN HEV’
Gerîla Edesa Întîqam jî ev yek anîn ziman: “Em li gel deng û dîmenê Rêber Apo ketin sala 2026’an; em bawer in ku em ê vê salê bi Rêber Apo re pêşwazî bikin. Têkoşîna ku em didin meşandin, bi israr e ku li gel vê têkoşînê em ê bi Rêbertiya azad re bigihîjin hevdu.”
Edesa Întîqam piştre bal kişand armanca têkoşîna xwe û got: “Em ê bi fikr û felsefeya Rêber Apo pergala tundî û talanê ya ku bi salan e li ser gel û jinan tê meşandin, hilweşînin; bi têkoşîneke hîn mezintir bo tevahî jinan jiyaneke azad û wekhev biafirînin û pêşengtiyeke xurt raber bikin.”
Gerîla Edesa Întîqam di dewama axaftina xwe de bal kişand ser girîngiya jinan a di nava civakê de û ev yek anîn ziman: “Civak li gel jinan azad û mukemel dibe, jiyan li gel jinan xweşik dibe. Ji ber vê yekê em dixwazin têkoşîna ku bi salan me daye meşandin hîn xurtir bikin û ji jinan re bibin îlhama têkoşînê. Çawa ku YJA Star di her warî de bo tevahî jinan bû çavkaniya hêz û moralê, ji niha û pê ve jî wê ev têkoşîn hîn xurtir û bi bandortir bibe.”
Edesa Întîqam di dawiya axaftina xwe de diyar kir ku ew ê têkoşîna xwe bi biryartir bidomînin û got: “Dîsa 8’ê Adarê roja têkoşîna jinên cîhanê li tevahî jinan pîroz dikin. Bi felsefeya ‘Jin Jiyan Azadî’ ber bi jiyaneke azad ve biçin û heta ku li ser jinekê êşkence were meşandin, em ê jî tu carî têkoşîna xwe ranewestînin.”
