Girtiyê nexweş ê giran ê 70 salî Mehmet Edip Taşar, ku di Girtîgeha Tîpa L a Jimar 5 a Marmarayê (Sîlîvrî) de tê girtin, dema vediguhastin Saziya Bijîşkiya Dadî (SBD) rastî êrişa devkî û fîzîkî ya bijîşkan hat.
Şaxê Stenbolê yê Komeleya Hiqûqnasan ji bo Azadiyê (OHD), ragihand ku Taşar ev êriş ji wan re gotiye û daxuyaniyek belav kir.
Daxuyaniya OHD’ê wisa ye:
“Girtiyê nexweş ê giran Mehmet Edip Taşar ê ku di Girtîgeha Sîlîvriyê ya Jimar 5 de tê girtin, ji me re ragihand ku dema ew birine Saziya Bijîşkiya Dadî, bijîşkên ku ew muayene kirine êrişa devkî û fîzîkî lê kirine. Taşar diyar kiriye ku wî gotiye ‘ez nikarim bimeşim’ lê bijîşkan bi gotinên ‘tu derewan dikî, tu dikarî bimeşî’ ew li erdê dirêj kirine, kaş kirine û bi zorê derxistine derve.
Mehmet Edip Taşar ku ketiye binê 40 kîloyan, girtina wî ya di şertên girtîgehê de ji bo mafê jiyanê rîskeke mezin e. Ji bo ku dermankirina wî li nexweşxaneyeke rêkûpêk berdewam bike, divê înfaza wî tavilê bê taloqkirin û bê berdan.
Em ji raya giştî re radigihînin ku em ê bibin şopdarê pêvajoya hiqûqî ya derbarê van binpêkirinên giran ên mafan de. Em bang li Saziya Bijîşkiya Dadî û hemû rayedarên têkildar dikin ku li gorî berpirsiyariyên xwe tavilê gavên pêwîst bavêjin.”
