Îsmaîl Tanboga yê ku di lîsteya girtiyên nexweşên giran a Komeleya Mafên Mirovan (ÎHD) de ye, tevî bangan nayê berdan. Tanboya ji ber pirsgirêkên tenduristiyê hestiyên wî dihelin, didanên wî dikevin û devê wî bêhêz bûye, nêzî 6 sal in bi xwarina tibî xwedî dibe. Ji bo Îsmaîl Tanboga yê ku roj bi roj kîlo winda dike, ev pêvajo veguherî êşkenceyê.
Îsmîl Tanboga sala 2015’an li navçeya Silopî ya Şirnexê di dema qedexeya derketina derve de hate girtin. Ji ber doza derbarê Îsmaîl Tanboga hatî vekirin, 4 caran cezayê hepsa muebedê lê hate birîn. Destpêkê kansera mîdeyê li cem Tanboga yê li Girtîgeha Girtî ya Tîpa T a Amedê tê ragirtin, hate teşhîskirin. Lê belê piştre hate raporkirin ku di mîdeyê de di asta pêş de ulser û gastrît heye. Nexweşiya Tanboga heya niha tam nehate teşhîskirin. Bêxwînî, birînên hundirê dev, êşa qirik û pişte, nerehetiya gurçîkan, ketina didanan û verişîna zêde bi Tanboga re hene. Bi alîkariya hevalên xwe yên qawîşê pêdiviyên xwe yên rojane pêşwazî dike.
Dayika girtiyê nexweş Îsmaîl Tanboga yê ku 10 sal in li girtîgehê ye û rewşa tenduristiya wî her diçe xirab dibe, Kumriye Tanboga bal kişand ser şert û mercên giran ên ku kurê wî di nav de ye û banga berdanê kir.
PÊDIVIYÊN WÎ NAYÊN PÊŞWAZÎKIRIN
Kumriye Tanboga diyar kir ku kurê wî 6 sal in bi xwarina tibî xwedî dibe û got, “Di zarokatiya xwe de ti sûcê wî nebû, hate girtin û êdî neberdan. Dema bû 18 salî, hate sirgûnkirin. Sala borî 40 kîlo bû, îsal daket 30 kîloyan.
Hemû pêdiviyên wî hevalên wî yên qawîşê pêşwazî dikin. Dema tê hevdîtinê jî bi zorê dimeşe. Dema em wî dibînin em xemgîn dibin, lê ew hewl dide moralê bide me. Dibêje, ‘xemgîn nebin, bi hêz bin’.” Kumriye Tanboga ji bo berdana girtiyên nexweş, bang kir.
Tanboga herî dawî ev tişt jî got: “Kurê min hîna pir ciwan e, lê êdî mîna mirovekî 50 salî dixuyê. Hem zarokatiya wî, hem ciwantiya wî dizîn. Mirovên nexweş nikarin li girtîgehê bimînin. Bila wan berdin, em ê zarokên xwe li mala xwe tedawî bikin. Em tenê aştî û aramiyê dixwazin. Divê hemû girtiyên nexweş, bên berdan. Gava aştiyê divê destpêkê wiha were avêtin.”
Bangên ku ji bo berdana Îsmaîl Tanboga heya niha hatine kirin û pêşnûmepirsên wekîlan, heya îro bêencam man.
