Ji bo “Pêvajoya Aştî û Civaka Demokratîk” piştgirya ji qada navneteweyî dewam dike. Endamê Mîsyona Hiqûqê ya Serbixwe ya Navneteweyî parêzerê Îtalyayî Ezio Menzione ku beriya bi demekê ji bo şopandina pêvajoyê li Tirkiyeyê hin serdan kiribû, li ser pêvajoyê axivî.
Menzione anî ziman ku her kesên wan hevdîtin pê re kir anîn ziman ku ji bo bidawîkirina şer pêwîstî bi çarçoveyeke hiqûqî heye û got, “Ev yek ne tenê meseleya bêdengkirina çekan e. Pêvajoya bêçekbûnê dewam dike û diyar e ku di demeke kurt de wê bi dawî bibe. Şopandina vê pêvajoyê girîng e.”
Ezio Menzione diyar kir ku AKP û piraniya hikumetê pirsgirêka yekane weke bêçekbûna PKK’ê û kontrolkirina vê yekê dibînin û got, “Ez di wê baweriyê de me ku pirsgirêk ne tenê pirsgirêka bêçekbûnê ye. Ji ber ku bêçekbûn di pratîkê de hema bibêje bi dawî bûye. Zêdeyî salek e li welêt şer neqewimî ye. Ev rewş gelekÎ girîng e. Bi taybetî dema ku mirov rewşa li welatên cîran bînin pêş çavên xwe.”
‘AZADIYA ABDULLAH OCALAN MESELEYEKE SIYASÎ YE’
Parêzer Menzione bal kişand ser ragirtina Rêber Apo û got, “Azadiya Birêz Ocalan meseleyeke siyasî ye. Hêvîdar im wê di demeke kurt de çareser bibe.”
Di vê çarçoveyê de Menzione işaret bi girîngiya bicihanîna biryarên Dadgeha Destûra Bingehîn û Dadgeha Mafên Mirovan a Ewropayê kir û got, “Ev gelekî girîng e; ji ber ku bi saya vê yekê gelek muxalîfên siyasî yên girîng dikarin bêne berdan. Mînak; Kavala, Demîrtaş û yên din. Dibe ku hejmar gelekî mezin nîne, lê belê dîsa jî hejmareke girîng e.”
‘DIXWAZIN HEVDÎTINÊ BI ABDULLAH OCALAN RE PÊK BÎNIM’
Parêzerê Îtalyayî Menzione bi bîr xist ku du hefte beriya serdana Tirkiyeyê bike, ji bo çûyîna Îmraliyê wan serlêdan kirin û got, “Em di wê baweriyê de bûn ku guhdarîkirina li Birêz Abdullah Ocalan bi xwe girîng bû. Çend hefte beriya mîsyona xwe me daxwaza hevdîtina bi Birêz Abdullah Ocalan re kir. Lê belê me nekarî bersivekê ji vê serlêdan û daxwaza xwe werbigirin.”
Menzione anî ziman ku ew hîn jî li benda qebûlkirina serlêdanê ye, eger ev yek pêk were ew amade ne ku biçin Bûrsayê û bi keştiyê biçin Îmraliyê.
