Parlamenterê Partiya Wekhevî û Demokrasiyê ya Gelan (DEM Partî) yê Amedê Serhat Eren, bi girtiyan re li ser binpêkirinên mafên wan hevdîtin kir. Eren piştî hevdîtinê li ber girtîgehê daxuyanî da û got ku li girtîgeh muameleya xirab û êşkenceyê li girtiyan dikin.
Eren der barê hevdîtina xwe ya bi girtî Omer Salîh Cûma re agahî parvekir û got ku di dema lêgerîna mezelan de gardiyanan êşkence li Cûma kirine. Eren diyar kir ku di saetên zû yên sibehê û derengiya şevê de lêgerîn tê kirin û gardiyan muameleya xirab li hember girtiyan pêk tînin. Eren diyar kir ku girtiyên ku cezayên wan xilas bûye, berdana wan ji aliyê Lijneya Îdare û Çavdêriyê ve tê astengkirin.
Eren ragihand ku berdana gelek girtiyan tê astengkirin û got: “Daxwazên girtiyên nexweş ên ji bo nexweşxaneyê neyên cîh anîn. Hin girtî ev salek e, li benda çûna nexweşxaneyê ne. Mafê girtiyên siyasî yên beşdarbûna çalakiyên civakî û hunerî tê astengkirin.”
Eren diyar kir ku girti bi zorê ji bo girtigehên din tên sirgûn kirin û daxwazên wan yên ji bo guhartina mezelan nayê qebul kirin. Bi domdarî Eren ev tişt got: “Ji ber van zextên ne mirovî, girtiyan dest bi greva birçîbûnê kirine.”
Eren ragihand ku girtiyan bi komên sê kesî bi dorveger dest bi greva birçîbûnê kirine û wiha got: “Heta ev pêkanîn bi dawî nebin, ew ê çalakiya xwe bidomînin. Dev ji van polîtîkayan berdin. Ev pêkanîn zirarê dide ‘Pêvajoya Aşitî û Civaka Demokratîk’. Ji ber vê yekê divê ev pêkanîn bi dawî bibin û bê rakirin. Divê Wezareta Dadê bikeve nava tevgerê.”
