Piştî banga dîrokî ya Rêber Apo ku di 27’ê Sibatê de de hat kirin, di mijara çareserî û nîqaşên diyalogê de geşedanên girîng çêbûn. Serokwekîlên Koma Meclîsê ya DEM Partiyê Gulîstan Kiliç Koçyîgît, Sezaî Temellî û Alîkarê Hevserokên Giştî yê ji Komîsyona Mafên Mirovan û Hiqûqê berpirsyar Ozturk Turkdogan bi Wezîrê Edaletê Yilmaz Tunç re hevdîtin pêk anîn.
Gulîstan Kiliç Koçyîgît a ku di heyetê de cih girt ji ANF’ê re axivî û diyar kir ku divê pêngavên berbiçav ji bo çareseriya pirsgirêkên rojane yên civakê bên avêtin û da zanîn ku ew ê di hefteya pêş de li Meclîsê têkildarî naveroka hevdîtinê bi partiyên siyasî re rûnin.
Gulîstan Kiliç Koçyîgît, hevdîtina bi Wezîrê Edaletê Yilmaz Tunç re weke civîna ku mafên bingehîn û edaleta civakê tê de hatin nîqaşkirin nirxand.
Gulîstan Kiliç Koçyîgît, da zanîn ku ew di hevdîtinê de li ser mijarên wekî tecrîda li ser Rêber Apo, girtiyên nexweş û pirsgirêkên girtîgehê nîqaş meşandine. Gulîstan Kiliç Koçyîgît, diyar kir ku divê ev civîn weke qonaxeke nû neyê destgirtin û got ku di mijarên mîna qanûnî û yasayî de gavên ku bên avêtin girîng in.
Gulîstan Kiliç Koçyîgît, da xuyakirin ku divê ji bo çareseriya pirsgirêka Kurd hîn bêhtir gav werin avêtin û pêvajo ji binê zemîna şîdet û pevçûnê bê derxistin û li ser bingeha siyasî û hiqûqî were bicihkirin. Gulîstan Kiliç Koçyîgît, diyar kir ku ji bo ev yek pêk bê divê desthilatdarî bi lez tevbigere û fikarên di nava civakê de ji holê rake. Gulîstan Kiliç Koçyîgît got, “Divê banga 27’ê Sibatê ya Birêz Ocalan, ji aliyê desthilatdariyê ve bêbersivandin.”
Gulîstan Kiliç Koçyîgît, destnîşan kir ku yek ji daxwazên wan a herî sereke pêkanîna Mafê hêviyê ye û diyar kir ku divê li ser vê mijarê rêziknameya qanûnî bê çêkirin û got ku ji bo vê jî demek hewce dike. Gulîstan Kiliç Koçyîgît, da zanîn ku di mewzuatên heyî de jî dikare şert û mercên Rêber Apo bê başkirin û bi cihana derve re têkiliyê deyne. Gulîstan Kiliç Koçyîgît, anî ziman ku ji bo pêşdeçûna vê pêvajoyê başkirina şert û mercên Rêber Apo yên xebatê girîng in û got ku li pêşiya vê astengî nîne.
Gulîstan Kiliç Koçyîgît, da xuyakirin ku rewşa tecrîdê ya li Îmraliyê mîna beriya Cotmehê didome û got ku her çend hevdîtinên dawî gihiştibe qonaxeke erênî jî, hê jî qels e. Gulîstan Kiliç Koçyîgît, diyar kir ku divê şert û mercên Rêber Apo bêne başkirin û li gorî pêvajoyê divê tecrîda li ser wî bê rakirin.
Gulîstan Kiliç Koçyîgît, destnîşan kir ku divê rêgezên qanûnî ku ne tenê DEM Partî di heman demê de hemû civak jê sûd werbigire bên çêkirin û wiha domand, “Divê di derbarê binpêkirinên mafên mirovan ên li girtîgehan de, bi taybetî di der barê girtiyên nexweş û rêziknameya înfazê de reformek bê kirin. Divê ev rêzikname ne tenê ji bo Kurdan, ji bo hemû gelên Tirkiyeyê derbasdar be.”
Gulîstan Kiliç Koçyîgît, da zanîn ku piştî hevdîtina bi Wezareta Edaletê re ew ê di rojên pêş de bi hemû aliyên siyasî re hevdîtinan pêk bînin û got, “Armanca van hevdîtinan ew e ku ji bo avakirina pergaleke demokratîk, wekhevîxwaz û azadîxwaz rêgezên qanûnî yên pêwîst bên çêkirin û lihevkirineke civakî pêk were.”
