Hêzên Ewlekariya Hundirîn a Jin li Kampa Roj a li bajarê Dêrikê ku malbatên çeteyên DAÎŞ’ê tê de dimînin, li dijî şaneyên DAÎŞ’ê û êrîşên wan, îro (5 Nîsan 2025) operasyon da destpêkirin.
Fermandariya Giştî ya Hêzên Ewlekariya Hundirîn (Jin) a Bakur û Rojhilatê Sûriyeyê derbarê mijarê de li kampê daxuyaniyek da çapemeniyê.
Ji fermandarên Hêzên Ewlekariya Hundirîn-Jin Awaz Welat bi zimanê Erebî û Bêrî Omer bi zimanê Kurdî daxuyanî xwendin.
Di daxuyaniyê de ev agahî hatin parvekirin:
“Geşedanên têkildarî ewlekariyê û êrîşên dubare yên ku herêm bi giştî û bi taybet jî Bakur û Rojhilatê Sûriyê rû bir û mane, rêya livdana şaneyên terorîst ên DAÎŞ’ê vekir. şaneyên DAÎŞ’ê ji vê rewşê sûd wergirtin û hewl dan ku rêzên xwe ji nû ve birêxistin bikin, planên terorî bi mebesta têkbirina ewlehî û aramiya herêmê pêk bînin. Hêzên me tevgerên metirsîdar ên van şaneyan, bi taybet li kampên ku malbatên çeteyên DAÎŞ’ê tê de ne, nexasim kampa Roj, şopandin.
Di demên dawî de, çend hewldanên derbasbûna kampê ji aliyê şaneyên DAÎŞ’ê ve hatin kirin ku jiyana nişteciyên kampê bixin bin gefan. Van şaneyan jinek û zarokek bi xwînsarî kuştin û destdirêjî li hejmarek jin û zarokan kirin. Her wiha gef li kesên ku hewl didin xwe ji îdeolojiya tundrew a vê rêxistina terorîst rizgar bikin, kirin. Ev tevgera çeteyan di çarçoveya xebatên berdewam ên DAÎŞ’ê de, ji ber girîngiya stratejîk a kampa Roj û ji bo tehrîkirina şaneyên razayî yên li hundir û derveyî kampê, tên kirin.
Li hember van gefan, hêzên me çendîn operasyonên pêşîgirtinê lidar xistin û hejmarek ji planên terorîstan têk birin. Di vir de jî şaneyên DAÎŞ’ê di hewldanên xwe yên belavkirina aloziyê û têkbirina aramiyê de derbeyên giran xwarin.
Li ser bingeha berpirsyariya xwe ya ji bo parastina gelê xwe û pabendbûna me ya bi têkoşîna li dijî terorê, em weke Hêzên Ewlekariya Hundirîn (Jin) bi piştgiriya Yekîneyên Parastina Jin (YPJ) destpêkirina hemleya ewlehiyê ya Hêzên Jinê yên di nava hêzên me yên ewlekarî û leşkerî de li dijî şaneyên DAÎŞ’ê radigihînin. Armanca me lêgerîna li kampa Roj, şopandin û girtina şaneyên razayî û alîkarên wan e.
Ev hemle berdewamiya tekoşîna me ya li dijî hemû hewlên terorîstên DAÎŞ’ê û nîşana îradeya me ya bibiryar a ji bo zuhakirina jêderên terorê û peydakirina ewlehî-aramiyê ji bo hemû pêkhateyên civaka me ye.
Em weke Hêzên Ewlekariya Hundirîn (Jin) eşkere dikin ku hemleya me heta em dawî li gefên şaneyên terorîst ên li dijî mirovên bê guneh dikin bînin, wê berdewam be. Her wiha wê parastina gelê me û pêkanîna ewlehiyê bibe karê me yê pêşîn ku em jê gavan paşde neavêjin.”
