Daxuyaniya Fermandariya Giştî ya HPJ’ê bi vî rengî ye:
“Di serî de, di şexsê heval Bêrîtan de em hemû şehîdên riya şoreşa Kurdistanê û tevahî jinên şoreşger ku di oxira riya azadiyê de gihîştine şehadetê bi bîr tînin û bejna xwe li beramber wan ditewîn in. Di heman demê de, salvegera 32’yemîn a damezrandina artêşbûna jinê, li tevahî jinên berxwedêr û têkoşînvanên azadiyê pîroz dikin. Meha Cotmehê di têkoşîna me ya azadiyê de, xwedî girîngî û wateyekî mezin a fedayîtiyê ye. Bi sekna serhildêr û berxwedêr a pêşenga me ya mezin heval Bêrîtan, 25’ê Cotmehê di hiş û mejiyê civaka Kurd de cihekî girîng girt. Bi sekna hevrê Bêrîtan re, ji bo tevahî jinan riya rizgariya ji koletiya salan vebû. Di heman demê de, li dijî komplo û xiyanetê, pêşiya berxwedaneke bi heybet a şoreşa jinan vebû. Ji ber hevrê Bêrîtan teslîmî nokeriyê nebû û bû abîdeyek. Ev sekna ku hevrê Bêrîtan raber kiriye, hişmendiya azadiyê ya ku Rêber Apo ew afirandî, careke din ji her kesî re raxist ber çavan. Ev wêrekiya bê hempa ya hevrê Bêrîtan, rê li ber rêxistinbûn û artêşbûna jinê vekir. Ji ber vê jî rastiya Bêrîtan ne tenê dîrokeke, felsefe û xeta jiyana azad e, ji bo me pîvana jiyanê ye. Îro bi hezaran şopdarên hevrê Bêrîtan, bi vê baweriyê û biryardariyê di nava şert û mercên herî zehmet ên jiyanê de têkoşîn dikin. Em di roja me de jî dibînin ku ne tenê jinên di nava refên azadiyê de cihê xwe digirin, di heman demê de hemû jinên cîhanê, li ser mîrasa vê têkoşînê helwestên xwe yên li dijî mejiyê mêrê serwer datînin holê. Jinên leheng ên mîna Bêrîtan, Ronahî, Zîlan, Aryen û bê dawî qehremanan, ji destpêkirina têkoşîna azadiyê re, di hemû qonaxên têkoşîna rizgariya gelê Kurd de, rola pêşengtiyê lîstin e. Bi wêrekî û cesareteke mezin ev hîmên artêşbûna jinê dewam kirin û ji şoreşên mezin ên jinan re zemînên bi hêz ava kirin. Ji ber vê jî jinan di şoreşên ku pêşengtiya wê kirine de, serkeftinên mezin bi dest xistine. Mînaka wê ya herî şênber jî, serhildana Jin Jiyan Azadî, ya di pêşengtiya jinên Rojhilatê Kurdistanê de ye. Jin li dijî hemû êrîş û tundiyan bi girseyî û yekbûyî rabûn ser piyan. Jinan bi rêka van berxwedanên mezin ku rû dane, berê xwe dan nava refên têkoşîn û dîrokên nû yên layiqî heqîqeta jinê ku nehatibû nivîsandin. Tevlîbûna hemû jinan jî, tenê fîzîkî nebû, di asta baweriyê û biryardariya jiyana azad de bû. Di çiyayan de tovên xwe yên jiyana bi rûmet şîn kirin û di bajaran de jî, kêlî bi kêlî vîn û hêz ava kirin. Di nava her şert û mercî de têkoşiyan û ti carî gavê xwe paşde ne avêt in. Bi vê baweriyê her tiştên ku hişmendiya mêrsalar digot nabe, bi israr pêk anîn. Hemû cewherên jinê ku hatibûn fetisandin, bi pêşketina hêza parastinê re, careke din derket holê. Pêşiya van hemû pêşketinan artêşbûna jinê vekir. Bê guman şertên jiyana gerîla û tevahî jinan di nav de têkoşîn kirin e, şertên herî zehmet û dijwar in. Lê îqnabûna azadiyê di jinan de, hestê berxwedêr û vînî bi xurt pêş xist.
Tundiya ku li dijî jinê îro jî bi pergala serdestiya mêr bi dijwarî dewam dike. Lewma jî her jina ku tevlî têkoşîna azadiyê dibe, ji vê qirkirin û dîroka dijberî jinê jî tolê hiltîne. Ev jiyana azad dibe tolhildana hemû helbest, gotin, stran, huner û jiyana jinê ya ku jê hatibû standin. Artêşbûna jinan a azad ku Rêber Apo jî wê weke amûra jiyana azad bi nav dike, bû bersiva herî dijwar a li dijî artêşbûna mêrên serdest, ku bi salan jin û civak rû bi rûyê komkujiyan hiştibû. Ji ber vê yekê jî îro li dijî têkoşîna me ya azadiyê êrîşên îdeolojîk gelek zêde ne. Ji bo vala derxistina vê îdeolojiyê bê navber polîtîkayên şerê taybet tên meşandin. Dixwazin vê hêzê bi rê û rêbazekê tune bikin û dibêjin ne dema gerîlatiyê ye. Li bajarên Rojhilatê Kurdistanê û Îranê, bê navber êrîş û destdirêjî li ser jinan tê meşandin. Di demeke bi vî rengî de em nikarin bêjin ku dema xweparastinê derbas bûye. Ji bo vê jî pêwîste hîn zêdetir jin berê xwe bidin têkoşîna azadiyê û di xeta berxwedanê de israr bibin. Em ê xeta ku bi Bêrîtanan destpê kirî û bi Aryenan mezin bûye, heta serkeftinê û misogerkirina civaka demokratîk û aştiyê bidomîn in.
Li ser vê bingehê, em careke din di şexsê şehîdê mezin a têkoşîna azadiyê hevrê Bêrîtan de, hemû şehîdên têkoşîna şoreşa Kurdistanê bi bîr tînin û bejna xwe li beramber wan ditewînin û soza pêkanîna xeyalên wan dubare dikin. Her wiha salvegera 32’yemîn a artêşbûna jinê, li hemû gelan, jinên berxwedêr û têkoşînvanan pîroz dikin. Em didin diyarkirin ku ev artêşa azad a jinan wê bibe hêza parastina hemû nirxên mirovahiyê û azadiya fîzîkî ya Rêber Apo mîsoger bike.”
