Êvara Înê, 24’ê Cotmehê wê li bajarê Koln ê Elmanyayê konsereke bi kelecaneke bilind bê lidarxistin. Di konserê de ku Hunera Mizgîn bi rêxistin dike, wê Nûarîn, Xecê, Firmesk û Berfîn Mamedova derkevin ser dikê. Konser wê li navenda bajêr li Sartory Ostermann Saalê pêk were.
Hunermendên ku bi rengê folklorîk, pop û protestê distirên, ji niha ve kelecan xistine nava dilê muzîkhezan. Lorîna Şewaqî ji ajansa me re axivî û got, “Ez li stranên Xecê gelekî guhdarî dikim. Lê belê çar hunermendên jin ên bên konserê ji bo min bûne kelecaneke cuda. Her yek ji wan bi rêbaza xwe rengekî cuda yê muzîkê ne. Wê bibe cihê kêfxweşiyê ku wan di heman şevê de li ser dikê bibîne.”
Gulêya Heso jî ji bo konserê got, “Ez li Dortmundê dimînim. Dema ku bi konserê hesiyam gelekî kêfa min hat. Ji ber ku ez heyranê muzîka popê me. Min tenê li ser platformên dîjîtal li Firmeskê guhdarî dikir. Yekemcar ez ê bi rengekî zindî lê temaşe û guhdarî bikim. Her wiha tiştekî bedew e ku konser diyarî aştiyê hatiye kirin. Daxwaz û armanca me hemûyan e ku gelê Kurdistanê bibe xwedî statu û gelê me bi mafên xwe yên neteweyî azad bibe.”
Xecê ku bi stranên xwe yên “Xezal”, “Gulê”, “Pismamo” û “Kêfa min ji te re tê” kete dilê bi milyonan mirovî, dîmenekî kurt kişand û bang li heyranên xwe kir ku beşdarî konserê bibin. Xecê got, “Guhdarên min ên ezîz, ez ê jî beşdarî konsera 24’ê Cotmehê bibim ku Hunera Mizgîn lidar dixe. Werin em bi hev re demeke xweş, bi kêf û bi coş derbas bikin.”
Yek ji hunermendên ku di konserê de derkevin ser dikê Firmesk e. Firmesk ku bi dengê xwe yê zelal û ji dil bi zaravayê Soranî distirê, helbesta Kurd a hemdem bi muzîka popê vedibêje. Hunermenda ji Mahabadê ji ber qedexeya dewleta Îranê neçar ma derbasî Silêmaniyeyê bibe û piştre jî neçar ma ku berê xwe bide Elmanyayê. Hunermend hunera xwe bi rêya konseran dewam dike. Bi taybetî jî bi strana xwe ya bi navê “Dardî Darun” deng veda.
Berfîn Mamedova jî muzîkhez vexwend konserê. Hunermend ku ji Kurdên ji Kazakistanê ye, bi stranên xwe yên protest tê naskirin. Hunermend Berfîn Mamedova dîmenek parve kir û heyranên xwe vexwend konserê: “Di 24’ê Cotmehê de ez ê tevlî konsera Aştî û Civaka Demokratîk bibim. Konserek e ku Hunera Mizgîn lidar dixe. Em li benda we ne.”
Hunermendeke din ku wê derkeve ser dikê Nûarîn e. Hunermend Nûarîn ku bi performansa xwe ya li ser dikê gelekî tê hezkirin bi albûmên xwe yên bi navê “Bes e Berxê” û “Hêvî” hatibû naskirin. Hunermend Nûarîn ku meqamên Kurd ên otantîk û awaza modern bi rengekî serketî digihîne hev, li saziyên çanda Kurd xizmetê dide.
