Di biryara DMME’yê de hate diyarkirin ku Moskovayê li ser ‘’xetên sînor ên revebirinê’’ ên li herêmên Abhazya û Osetyaya Başûr ku piştgiriyê dide wan, mafên welatiyên xwecihî binpê kiriye.
Dadgehê diyar kir ku vê yekê bandor li nêzî 29.000 welatiyan kiriye û biryar da ku ji welatiyên mexdûr re tezmînata manewî were dayîn.
Dadgeha li Strasbourgê da zanîn ku Rûsyayê piştî şerê di sala 2008’an de li gel pêvajoya ‘’sînorkirinê’’ ya li ser xakên Gurcistanê, nehiştiye welatî xwe bigihînin xanî, xak û malbatên xwe.
Li gorî DMME’yê binpêkirina herî mezin ji ber ‘’astengkirina derqanûnî’’ ya li ser herî kêm 23.000 welatiyên Gurcî pêk hatiye. Ev welatî wê ji ber binpêkirina mafên weke jiyana taybet, parêzbendiya xaniyan û mafên milkiyetê tezmînatê bistînin.
Her wiha hate diyarkirin ku hin mexdûr ji mafê perwerdeya bi Gurcî bêpar hatine hiştin û nêzî 2.500 welatî jî bi hinceta ku ji xeta sînor derbas bûne bi awayekî derqanûnî hatine binçavkirin.
RÛSYA DAYÎNA TEZMÎNATAN RED DIKE
Her çend Rûsya di sala 2022’yan de piştî dagirkirina Ûkraynayê ji Konseya Ewropayê hatibe derxistin jî ji binpêkirinên di serdema alîgirbûna Konvansiyonê de bi awayekî hiqûqî berpirsiyar e. Lê belê Moskovayê gelek caran da zanîn ku êdî ew biryarên DMME’yê zarûrî nabîne û cezayên bi vî rengî nade.
Her wiha pispor jî di wê baweriyê de ne ku Rûsya vî cezayî nade.
