Rojnamevan Îbrahîm Xwedêda têkildarî geşedanên dawî yên li Rojava û bandora wan li ser civaka Êzidî ji ANF’ê re axivî û da zanîn ku rewşa niha rû dide li dijî qanûnên navneteweyî ye û bang li civaka Êzidî kir ku li dijî her cûre êrîşan yekîtiya xwe ava bikin.
Îbrahîm Xwedêda di destpêka axaftina xwe diyar kir ku ew wekî civaka Êzidî ji rewşa li Rojava dilgiran in û destnîşan kir ku çeteyên girêdayî HTŞ, DAÎŞ û dewleta Tirk di serî de kêmneteweyên wekî Durzî, Elewî, Êzidî û Kurd kirine armanc û got: ‘’Polîtîka û êrîşên hêzên HTŞ’ê wekî yên serdema DAÎŞ’ê ne. Divê ev yek neyê qebûlkirin. Rewşa îro senaryoya sala 2014’an tîne bîra me. Wê demê em ne amade bûn û hinek aliyên ku digotin em ê we biparêzin, xiyanet li me kirin û em bi tenê hiştin. Lê îro ferqeke mezin heye ku a niha hem civaka me hişyar e, hem jî hêzên me yên parastinê hene. Divê em bi yekîtî û tifaqa xwe van planan pûç bikin.’’
Rojnamevan Xwedêda piştre bang li serokên eşîran û rûspiyên Şengalê kir ku di zûtirîn dem de li hev bicivin û ev yek anîn ziman: ‘’Dema em yek bin, tu hêz nikare me têk bibe. Dîrok şahid e ku gava em tengav dibin, ji bilî Çiyayê Şengalê tu palpiştekî me nîne. Divê em careke din xwe li Çiyayê xwe bigirin.”
Îbrahîm Xwedêda di dawiya axaftina xwe de rexneyên tund li Hikûmeta Iraqê û saziyên mafên mirovan kir û got: ‘’Ev 11 sal in em li dû şopa dayik û keçên xwe ne yên di destê çeteyan de ne. Piştî valakirina kampan, tu agahî ji wan nehat girtin. Saziyên navneteweyî çima bêdeng in? Ev yek ji bo Iraqê şerma herî mezin e. Heya niha nekariye Êzidiyan vegerîne ser cih û warên wan, lê belê dikare bi hezaran malbatên DAÎŞ’î vegerîne. Ev ne wijdanî û ne jî qanûnî ye.”
