Komeleya Mafên Mirovan (ÎHD) ji bo ku lêpirsîna têkildarî mirina bi guman a xwendekara Zanîngeha Sedsalê ya Wanê Rojîn Kabaîş were ronîkirin, bang li Wezareta Edaletê, Saziya Tiba Edlî, Komîsyona Mafên Mirovan a Meclîsê, baroyan, navendên mafên mirovan û rêxistinên civakî yên sivîl kir.
Komeleyê bi daxuyaniyên çapemeniyê ku bi rengekî hemwext li gelek bajaran da, destnîşan kir ku polîtîkayên bêcezatiyê didomin.
MEKANÎZMAYÊN DEWLETÊ FAÎL DIPARÊZE
Hevseroka Şaxa Wanê ya ÎHD’ê Ayten Kiran got, “Mekanîzmayên dewletê û Saziya Tiba Edlî şûna ku sedemên rast ên mirina jinan eşkere bike, raporên ku ji bo parastina faîl xizmetê dike, çêdike û malbatan neçar dike ku bi salan li benda edaletê bimînin. Ev rewş, yekser gefê li ewlehiya jinan û malbatan dixwe.”
Komeleyê xwest ku têkildarî mirina bi guman a Rojîn Kabaîş demildest lêpirsîneke bi bandor were vekirin û di cînayetên jinan de dawî li polîtîkaya bêcezatiyê were. Her wiha komeleyê daxwaz kir ku Peymana Stenbolê car din were îmzekirin.
Banga ÎHD’ê li şaxên Wan, Îzmîr, Dersim, Riha û Êlihê jî bi rengekî hemwext bi daxuyaniyan hate ragihandin. Di çalakiyan de pankartên “Ji bo Rojîn edalet” û “Întihar nîne, cinayet e. Çi bi Rojîn hat?” hatin vekirin.
