Tora Mafê Mirovan a Kurdistanê ragihand ku ji bo du girtiyên siyasî yên Kurd û beşdarvanên Şoreşa ‘Jin, Jiyan, Azadî’ cezayê darvekirinê hate dayîn.
Hate diyarkirin ku girtiyên siyasî Reûf Merûfî û Mihemed Ferecî yên ji bajarê Bokan a Rojhilatê Kurdistanê, piştî 3 salan di girtîgeha Bokan de man, ji aliyê liqa 1 ya Dadgeha Şoreşa Îslamê ya Mihabadê ve bi cezayê darvekirinê hatin mehkûmkirin.
Rêxistinê da zanîn ku her du girtiyên siyasî bi sucê ‘çekdarî’ hatine cezakirin. Duh (24’ê Sibatê) cezayê darvekirinê yê li ser her du girtiyên siyasî Reûf Merûfî û Mihemed Ferecî bi fermî hate ragihandin. Niha jiyana her du girtiyan dibin metirsiyê de ye.
Hêjayî gotinêye ku di 26’ê Sibata 2023’yan de Reûf Merûfî û Mihemed Ferecî, ji aliyê hêzên wezareta îstîxbaratê ya Îranê ve li Bokanê hatin binçavkirin. Ji wê demê ve ji bo wergirtina îtîrafên bi darê zorê, êşkenceyên fîzîkî û derûnî li her du girtiyan hate kirin. Piştî lêpirsînê, ew şandin girtîgeha Bokanê.
Malbatên van her du girtiyên siyasî ji dema binçavkirina wan ve, di bin zext û gefên dezgehên ewlehiyê de ne ku tu agahî û zanyariyek li ser zarokên xwe yên girtî belav nekin.
