Artêşa Îsraîlê sibeha Pêncşemê daxuyaniyek da û diyar kir ku bi 40 balafirên şer bombe li dehan hedefan hatine barandin. Di daxuyaniyê de hate gotin, “Tevahiya şevê bi agahiyên hesas ên departmana îstîxbaratê 40 balafirên şer bi zêdeyî 100 muhîmatan bombe li dehan hedefên leşkerî yên li Tehran û herêmên cuda yên Îranê barandin.”
LI SANTRALA NUKLEERÎ YA ARAKÊ HATE XISTIN
Di daxuyaniyê de hate ragihandin ku li santrala nukleerî ya Arakê û tesîseke nêzî Natanzê hate xistin. Li gorî daxuyaniyê, “Avaniya ku reaktorê digire, ku pêkhateya bingehîn a hilberîna plutonyûmê ye, bû hedefa êrîşê.” Avakirina reaktorê sala 1997’an destpê kiribû, lê belê ji ber destwerdana civaka navneteweyî nehatibû temamkirin.
Li gorî daxuyaniyê sîstemên parastina hewayî, hilberîna fuzeyan, bataryayên parastina hewayî yên rejîma Îranê, navendên depokirina fuzeyan, radar û wesayitên hatin tespîtkirin ji hewayê hatin îmhakirin.
LI ÎSRAÎLÊ TEQÎN
Serê sibehê li Tel Avîv û Qûdsê jî dengê teqînên mezin hate bihîstin. Têkildarî teqînan agahiyên berfireh bi dest neketin.
Li gorî medya Îsraîlê di encama êrîşên Îranê li Holonê 3 jê giran bi dehan kes birîndar bûn, li Ramat Ganê 16 kes, li Sorokayê kesek birîndar bû. Hate ragihandin ku li Sorokayê xisar li nexweşxaneyekê bû. Wezareta Tenduristiyê nerazîbûn nîşanî ‘sûcê şer’ da.
BÎLANÇOYA FERMÎ: LI ÎRANÊ 224 KES MIRIN
Li gorî daxuyaniya fermî ya Îranê, di encama bombardûmana Îsraîlê de li Îranê herî kêm 224 kesan jiyana xwe ji dest dan, zêdeyî hezar kes jî birîndar bûn.
RÊXISTINA CIVAKÎ YA SIVÎL: HERÎ KÊM 639 KES MIRIN
Ajansa Nûçeyan a Associated Pressê daneyên rêxistina ‘Parêzvanên Mafên Mirovan’ weşand ku navenda wê li Washingtonê ye û diyar kir ku di êrîşên Îsraîlê de yên li ser Îranê 639 kes mirin, 1.329 kes jî birîndar bûn. Li gorî daneyên hatin piştrastkirin 263 ji kesên hatin kuştin sivîl, 154 jî endamên hêzên ewlekariyê bûn.
LI ÎSRAÎLÊ 24 KES MIRIN
Li gorî rayedarên Îsraîlê, di êrîşên Îranê yên bi fuzeyan û balafirên bêmirov de herî kêm 24 kesan jiyana xwe ji dest dan, 592 kes jî birîndar bûn.
LI ÎRANÊ GIRTIN
Ajansên Nûçeyan ên Îranî diyar kirin ku li bajarê Meşhed ê li bakurrojhilatê Îranê 18 ‘ajanên dijmin’ hatin girtin ku ji bo Îsraîlê êrîşan bike amûrên hewayî yên bêmirov hildigerandin.
WSJ: TRUMP PLANA ÊRÎŞÊ ERÊ KIR
Li gorî Wall Street Journalê, Donald Trump ji şêwirmendên xwe re gotiye, plana êrîşa li ser Îranê erê kiriye, lê belê ji bo bibîne bê Tehranê dest ji bernameya nukleerî berdaye yan na, plan sekinandiye. Rayedarekî ji Qesra Spî ji AFP’ê re li ser mijarê got, “Hemû rê û alternatîf li ser maseyê ne.”
