Berdevkê Sefîrê Bilind ê Dewletên Yekbûyî yên Emerîkayê (DYE) yê li Bexdayê roja Yekşemê daxuyaniyek da û diyar kir ku Washigtonê muafiyeta ji sala 2018’an û vir ve ji Iraqê re nas dike ‘nû nekiriye’, ku bi vê muafiyetê re Iraqê dikarîbû gaz û elektrîkê ji Îranê bikire.
Li gorî nûçeya AFP’ê, berdevkê sefareta bilind vê biryarê ‘garantî kiriye ku Îran ji aliyê aborî û malî ve rehet nebe, bêhn neyê ber’.
Di daxuyaniyê de hate gotin, “Em bang li hikumeta Iraqê dikin ku dawî li neçariya xwe ya bi çavkaniyên enerjiyê yên Îranê bîne û biryardariya Serokwezîr bi kêfxweşî pêşwazî dikin ku dixwaze Iraq ji aliyê enerjiyê ve serbixwe bibe.”
DYE’yê di heman demê de zexta xwe ya li ser Bexdayê zêde kir ku destûrê bide ji bo petrola xav ji herêma Kurdistanê di ser Tirkiyeyê re bê firotin.
Li gorî pisporan, Washington ji bo daxwaza petrolê ya li cîhanê zêde bike û buhayê petrolê kontrol bike, hewl dide hilberîna petrolê ya li Iraqê zêde bike.
DYE bi hinceta astengkirina bernameya nukleerê ya Tehranê dixwaze firotina petrola Îranê asteng bike. Lîderê olî yê Îranê Alî Xamaney beriya niha diyar kiribû ku wê bi DYE’yê re danûstandinê neke.
Hikumeta DYE’yê ragihandibû ku ji bo desthilatdariya li Îranê ji aliyê aboriya navneteweyî ve îzole bike û karê bidestxistina çeka nukleerî lawaz bike, dixwaze hatineya Îranê ya ji petrolê bibire.
