Meclîsa Malbatên Şehîdan a Bajarê Hesekê ji bo gerîlayên HPG’ê Demhat Serêkaniyê (Raman Yûsif) û Zinar Hesekê (Qusey Ebdo) ku di sala 2023’yan de li herêma Zapê şehîd bûne, 3 kon li Qada Suryan a bajar vegirtin. Bi hezaran şêniyên bajar bi hemû pêkhateyên wê herikîn bin konê sersaxiyê.
Merasîmê bi rêzgirtinê destpê kir. Piştre endama Meclîsa Malbatên Şehîdan Gulê Mihemed axivî û got: “Di kesayeta şehîd Raman û Qusey de em hemû şehîdên ku ji bo aştî û azadiyê canê xwe feda kirine bi bîr tînin. Gerîla ji zêdetirî 50 salan ve li hemberî zilm û zorê û ji bo azadiya hemû pêkhateyan tê dikoşin.”
Ji fermandarên Meclîsa Leşkerî ya Hesekê Mistefa Mardînî jî got: “Em îro 2 şehîdan oxir dikin ku canê xwe di ber axa welat de dan. Yek ji van şehîdan Zinar Hesekê ye ku ji pêkhateya Ereb e. Zinar sînorê ku dijmin daniye nas nekir û ji çend sal ve tev li nava refên gerîla bûbû.”
Di merasîmê de ji rêveberên PYD’ê Kilara Reqayê sersaxî ji malbatên şehîdan re xwest û got, van gerîlayên azadiyê bi salan li çiyayên azadî zor û zehmetî dîtin û berxwedanî li hemberî dagirkeriya Tirk kirin.
Endama Kongra Star Cîhan Xalid jî anî ziman ku xwedîderketina li şehîdan erkeke dikeve ser milê her kesî û got: “Ji me tê xwestin ku xwedî li bîranînên wan derkevin û destkeftiyên wan biparêzin.”
Bi navê malbata şehîd Zinar, Abdullah Betran li ser kesayeta şehîd Zinar got: “Dema behsa şehîdan û keda wan tê kirin ziman lal dibe. Şehîd Zinar ji êla Xeracîna ye ku di rêya xilasiya ji zilma DAÎŞ û komên tundraw ên hewl dan herêmê me dagir bikin, gelek şehîd dane.”
Bi navê malbata şehîd Demhat jî Rojîn Yûsif jî got: “Şehîd Raman ji tevahî endamên malbatê re palpişt bû. Dengê teqîqetê bû ku rêya aştî û azadiyê hilbijart.”
Endama Meclisa Malbatên Şehîdan Rojda Ehmed nasnameyên herdu şehîdan xwendin û pêşkêşî malbatên wan kirin.
Merasîm bi berzkirina dirûşmên dilsoziya bi şehîdan re bi dawî bû.
