Mehmet Emîn Çam ê 73 salî li Girtîgeha Tîpa T a Qûbînê ya Êlihê tê ragirtin û yek ji girtiyên nexweş ên rewşa wan giran e. Çam, di 16’ê Nîsanê de krîza dil derbas kir û rakirin Nexweşxaneya Perwerde û Lêkolînê ya Êlihê. Piştî tedawiyê jî Çam duh careke din birin girtîgehê.
Parêzera Çam, Nezahat Celen duh ji bo înfazkirina cezayê Çam were taloqkirin, serî li Dadgeriya Înfazê ya Sêrtê da. Nezahat Celen, di serlêdanê de xwest ku dozgerî sedemên hatine destnîşankirin berçav bigire û bi sedema pirsgirêkên tenduristiyê, înfazkirina cezayê Çam taloq bike.
Di serlêdanê de hate destnîşankirin ku Çam du caran krîza dil derbas kiriye û xetere heye ku cara 3’yemîn krîza dil derbas bike. Her wiha hate gotin ku 2 demarên Çam xitimî ne, tumora di mejiyê wî de mezin dibe, aliyê wî yê çepê felc e, nexweşiyên wî yên gurçik, dîtin û bihîstinê hene.
Hat diyarkirin ku domandina tedawiya wî ya li girtîgehê xetereyê li ser jiyana Çam çêdike, tevî tedawiya Çam didomiya jî dîsa şandine girtîgehê û hat gotin ku mercên tehliyeya Çam ava bûne.
Bi domdarî di daxwaznameyê de xala 3’yemîn a PMME’yê ya “qedexeya îşkence û miameleya xerab” û xala 17’emîn a “Parêzbendiya hebûna madî û manewî ya kes” hatin bibîrxistin û hat gotin ku ev mafên Çam hatine binpêkirin. Her wiha parêzer cih da biryarên mînak ên DMME’yê jî û got ku Çam ji ber nexweşiyên xwe yên giran nikare li girtîgehê bijî. Di daxwaznameyê de hate xwestin ku înfazkirina cezayê Çam were taloqkirin û were berdan.
