Li Dersimê 23’emîn Mihrîcana Çand û Xwezayê ya Mûnzûrê ku bi dirûşmeya “Dersim jiyan e; Dest nede xweza, vîn, ziman û baweriya min” bi çalakiyên cuda berdewam dike. Di çarçoveya mihrîcanê de panela bi ser navê “Geşedanên li Rojhilata Navîn, Pirsgirêka Kurd û Çareseriya Demokratîk” hate lidarxistin. Panel li Kolana Hunerê ya Dersimê hate lidarxistin û moderatiya wê rojnamevan Ergîn Dogru kir.
Di panelê de nûnerên Partiya Sosyalîst a Bindestan (ESP), Partiya Kedê (EMEP), Federasyona Meclîsên Sosyalîst (SMF) û DEM Partiyê axivîn.
‘PARASTINA ŞOREŞA ROJAVA ERKA HERÎ GIRÎNG E’
Cîgirê Hevserokê ESP’ê Sezîn Ûçar diyar kir ku dema qala çareseriya pirsgirêka Kurd tê kirin, divê geşedanên li Rojhilata Navîn teqez werin hesabkirin. Sezîn Ûçar anî ziman ku dewleta Tirk li hemberî pêvajoyên diyalogê yên li Îmraliyê ti gavekî şênber navêje û wiha got: “Divê em çareseriya çînî ya pirsgirêka Kurd bi avakirina girêdaniyên xurt ên bi karker û kedkarên Tirk re vebêjin. Parastina Şoreşa Rojava yek ji erkên me yên herî girîng e. Ev ne meseleyeke ku tenê bi komîsyonê çareser bibe ye; divê gel li kolanê îradeya xwe ya çareseriyê nîşan bide.”
Nûnerê Partîzan Kazim Tosûn jî bal kişand ser polîtlkayên kedxwariyê yên emperyalîzmê li Rojhilata Navîn û diyar kir ku divê mafê wekheviyê ya sosyaslîst û neteweyên bindest di her şertî de were parastin.
Cîgirê Serokê Giştî yê EMEP’ê û Parlamentera Dîlokê Sevda Karaca got ku têkoşîna gelê Kurd dînamîka bingehîn a pêvajoyê aştiyê ye.
Berdevkê Demê yê SMF’ê Mahîr Gurz destnîşan kir ku divê mafê çarenûsê ya gelê Kurd were naskirin û di navenda çareseriyê de cih bigire.
‘DIVÊ JI BO OCALAN QADA POLÎTÎK WERE VEKIRIN, AZADIYA WÎ YA FÎZÎKÎ WERE PÊKANÎN’
Parlementerê DEM Partî yê Stenbolê Cengîz Çîçek jî di axaftina xwe ya panelê de wiha got: “Li her qada ku em lê ne divê ne tenê berxwedanê, di heman demê de pergala xwe birêxistin bikin. Dîrok nîşanî me dide ku heta ev nebe dawî têkçûn e. Dema ku em vê pirsgirêkê li ser bingeha azadiyê bigirin dest, divê perspektîfa demokratîk a Rojhilata Navîn li ser lingan bigirin.”
Çîçek destnîşan kir ku di vê pêvajoyê de ji aliyê Rêber Apo ve her tiştê erênî û neyînî tê nîqaşkirin û wiha got: “Ez wek kesekî çûme Îmraliyê; li aliyekî dewlet li aliyekî Birêz Ocalan heye. Lê ew di hawirdorek wiha bêderfet de hewl dide vî karî bimeşîne ku ne wekhev dimeşe. Ji bo ku Birêz Ocalan bikaribe rola xwe bilîze divê bi awayekî fîzîkî azad bibe.”
Panel bi beşa pirs û bersivan bi dawî bû. Mihrîcan bi bernameya muzîkê ya Gerok Ma’yê dewam kir.
