Çalakiya Şaxa Amedê ya ÎHD’ê û malbatên windayan a “Bila winda bên dîtin û faîl bên darizandin” di hefteya 834’emîn de jî dom kir. Çalakî li pêşiya Bîrdariya Mafê Jiyanê ya li Parka Koşuyolu ya navçeya Rezan a bajarê Amedê pêk hat. Malbatên windayan, nûnerên rêxistinên civaka sivîl ên li bajarê û gel beşdarî çalakiyê bû.
Di çalakiya vê hefteyê de aqûbeta Kemal Mubarîz hat pirsîn ku 1’ê Sibata 1994’an de li navçeya Şirnex a Cizîrê hat windakirin.
Piştî axaftina Sektererê Şaxa Amedê Omer Saman, Endamê Desteya Rêvebir a Şaxa Amedê ya ÎHD’ê Alî Îhsan Demîrtaş çîroka Mubarîz vegot.
ÊLIH
Li Êlihê jî malbatên windayan û endamên ÎHD’ê di hefteya 670’emîn a çalakiya xwe de li pêşiya Bîrdariya Mafên Mirovan a li ser cadeya Gulîstanê li hev kom bûn. Malbatên windayan, parêzvanên mafên mirovan, endam û rêveberên MEBYA-DER, OHD, DEM Partî û DBP’ê beşdarî çalakiyê bûn.
Di çalakiya vê hefteyê de aqubeta Mehmet Şîrîn Maltu hat pirsîn ku di 31’ê Çileya 1995’an de li navçeya Êlihê Hezroyê hat binçavkirin û careke din tu agahî jê nehat wergirtin. Çîroka windakirina Maltu ji aliyê rêveberiya Şaxa ÎHD’ê Rêzan Baytar hate vegotin.
COLEMÊRG
Malbatên windayan û Şaxa ÎHD’ê ya Colemêrgê, li Kolana Hunerê ya Geverê di hefteya 160’an de li hev kom bûn. Di çalakiya vê hefteyê de, bal kişandin ser dosyaya Mehmet Ertak ku berî niha 33 salan li Şirnexê di bin çavan de hat windakirin.
Metna daxuyaniya çapemeniyê ji aliyê rêveberê ÎHD’ê Ozak Akbaş ve hate xwendin û berî daxuyaniyê darbeya qeyûman hat şermezarkirin.
ÎZMÎR
Şaxa Îzmîrê ya ÎHD’ê çalakiya “Bila winda bên dîtin û faîl bên darizandin” ku du hefteyan carekê lidar dixe, vê hefteyê li pêşiya Sumerbankê ya li navçeya Konakê lidar xist. Di çalakiyê de pankarta “Kiryar diyar in, winda li ku ne” hat vekirin. Di çalakiya vê hefteyê de aqubeta Ferhat Tepe hat pirsîn ku 28’ê Tîrmeha 1993’yan di bin çavan de hat windakirin.
Hevserokê Giştî yê Giştî yê ÎHD’ê Huseyîn Kuçukbalaban û gelek nûnerên partiyên siyasî û rêxistinên civaka sivîl beşdarî daxuyaniyê bûn.
Hevserokê Giştî yê Giştî yê ÎHD’ê Huseyîn Kuçukbalaban wiha axivî: “Li ser vê erdnigariyê gelek kes ji ber Kurdbûna xwe, ji ber fikra xwe ya siyasî û parastina nirxên xwe di salên 1990’de di bin çavan de bi êşkenceyên giran hatin windakirin. Divê aqubeta nêzî 17 hezar windayan bê zanîn.”
Daxuyanî piştî çalakiya rûniştinê bi dawî bû.
