Hevserokê Şaxê Amedê yê SES’ê Mehmet Nûr Ûlûs ragihand ku ji bo xweayeke paqij, ava paqij û gelekî bi tenduristiyeke baş pêvajoya aştiyê gelekî girîng e û got, “Pêvajoya aştiyê ne tenê siyasî ye, di heman demê de pêvajoyeke welê ye ku yekser bandorê li qadên ekolojîk, çandî û tenduristiyê dike.”
Hevserokê Şaxê Amedê yê Sendîkaya Kedkarên Xizmetên Civakî û Tenduristiyê (SES) Mehmet Nûr Ûlûs ji ANF’ê re axivî û bi bîr xist ku bi taybetî şerê piştî pêvajoya 2013’an ji nû ve destpê kir di nava civakê de bû sedema windahiyên girîng. Ûlûs ragihand ku şer bandorên travmatîk li ser gel dihêle û got, “Mirov li her qadê li zext û zordariyê rast hatin. Rêya kêmkirina vê travmayê jêbirina şopên şer û jinûve afirandina atmosfera baweriyê ye.”
‘BINPÊKIRINA MAFÊN MIROVAN DIVÊ BI DAWÎ BIBE’
Ûlûs bi bîr xist ku bi banga 27’ê Sibatê re pêvajoyeke nû destpê kir û diyar kir ku di vê pêvajoyê de gel û siyasetê daxwaza aştiyê hîn bi xurtî anîn ziman. Ûlûs destnîşan kir ku ji bo aştî di nava civakê de bersiva xwe bibîne hêmana herî girîng gavên samîmî û şênber in û di vir de jî wezîfeyên girîng dikevin ser milê desthilatdariyê. Bi dewamî Ûlûs got, “Beriya her tiştî divê mafên mirovan li her qadê bi cih bêne anîn. Binpêkirinên mafên mirovan ên li girtîgehan û li nava civakê bi dawî bibin. Girtiyên nexweş divê bêne berdan. Ev yek ji gavên herî girîng ên mezinkirina pêvajoya aştiyê ye. Her wiha mafê zimanê dayikê yek ji sernavên bingehîn ên pêvajoya aştiyê ye. Mirovek bi zimanê xwe yê dayikê û çanda xwe tê naskirin. Maf divê bêne naskirin û bi destûra bingehîn bêne ewlekirin. Di vir de divê daxwazên civakê bêne guhdarîkirin. Aştî tenê dema ku pêwîstiyên gel li ber çavan hate girtin dikare mayinde bibe.”
‘PÊVAJOYA AŞTIYÊ NE TENÊ SIYASÎ YE’
Ûlûs diyar kir ku di şer de bandora herî giran li jin û zarokan dibe û got, “Zarok bi rengê astengdar an jî bi tenduristiyeke nebaş dikarin ji dayik bibin. Jidayikbûnên herî bi pirsgirêk li herêma me dibe û ev rewş pêwendiya xwe yekser bi şer heye. Ji bo xwezayeke paqij, avake paqij û gelekî bi tenduristiyeke baş aştî gelekî girîng e. Pêvajoya aştiyê ne tenê siyasî ye, di heman demê de pêvajoyeke welê ye ku bandoreke yekser li qadên ekolojîk, çandî û tenduristiyê dike.”
‘WÊ BIRÎNÊN KÛR JÎ DERMAN BIKE’
Ûlûs diyar kir ku bûyerên tundiyê, rahiştina çekan a şexsî û fikarên li nava civakê, krîza aboriyê jî ji berhemên şer in û got, “Pêvajoyên berî û piştî 2013’an şopên gelekî kûr li ser gel hiştin. Mirovan hem ji aliyê madî hem jî ji aliyê manewî ve winda kirin. Şopên vê yekê hîn jê neçûne. Mİrov hîn jî hesabê windahiyan dipirsin û şîna wan girê didin. Gelek caran mafê şînê jî ji mirovan tê standin an jî şîn tê derengxistin. Li gel polîtîkbûnê her wiha şer ji aliyê exlaqî ve jî zerareke cidî dide civakê. Yekane rêya kêmkirina vê êşê bidawîkirina şer e. Ji bo vê jî divê her kes bi berpirsyariyê rabe. Ji bo nifşên bi tendurstiyeke baş şert e ku ev pêvajo bi ser bikeve.”
‘CIVAKEKE BI TENDURISTIYEKE BAŞ BI POLÎTÎKAYÊN ÇÊ AVA DIBE’
Ûlûs destnîşan kir ku weke kedkarên tenduristiyê ji bo vê pêvajoyê çi ji destê wan bê ew ê bikin û got, “Civakek bi tenduristiyeke hîn baş bi bicihanîna polîtîkayên çê dibe. Rêya herî mezin a jibîrkirina şopa şer a li nava gel avakirina aştiyê bi gavên şênber û mayinde ye.”
