Li bajarê Erdexanê, li navçeya Tatos a Erzîromê, navçeya Kerboran a MêrdîNê, navçeya Milazgir a Mûşê û li bajarê Semsûrê Newroz bi coşeke mezin hate pîrozkirin.
ERZÎROM / TATOS
Li gel baranê jî gel herikî qada Newrozê. Ji navçeyên derdorê jî gelek kes tevlî pîrozbahiyê bûn û dirûşma ‘Jin, Jiyan, Azadî’ hate qîrîn. Hevşaredarê Bajarê Mezin ê Wanê yê ji wezîfeyê hate dûrxistin Abdullah Zeydan li pîrozbahiyê axivî û bal kişand ser girîngiya peyama Rêber Apo.
Hevberdevka HDK’ê Meral Daniş Beştaş jî bi bîr xist ku Rêber Apo ji bo çareseriya pirsgirêka Kurd işaret bi girîngiya zemîna siyasî û hiqûqî kiriye û got, “Pêwîstiya lezgîn a vî welatî ev e.” Piştî axaftinan agirê Newrozê hate dadan û govend hate gerandin.
MÊRDÎN / KERBORAN
Newroz bi dirûşma ‘Newroza Azadiyê ji bo Civaka Demokratîk’ hate pîrozkirin. Qada Newrozê bi alên DEM Partî û DBP’ê hate xemilandin.
Hevserokên bajar û navçeyê yên DEM Partiyê qala girîngiya peyama Rêber Apo kirin. Berdevka DEM Partiyê Ayşegul Dogan jî destnîşan kir ku xwedîderketina gelê Kurd a li têkoşîna demokrasî û azadiyê dewam dike. Piştî axaftinan agirê Newrozê hate dadan û govend hate gerandin.
MÛŞ / MILAZGIR
Newroz li Sûka Eskî Kasaplar hate pîrozkirin. Beşdar bi kincên neteweyî tevlî pîrozbahiyê bûn. Di pîrozbahiyê de dirûşmên ‘Bijî Serok Apo’ û ‘Jin, Jiyan, Azadî’ hatin qîrîn. Piştre parlamentera DEM Partiyê Sumeyye Boz axivî û diyar kir ku agirê Newrozê bi banga Rêber Apo geş dibe. Piştî axaftinan agirê Newrozê ji aliyê dayikên aştiyê ve hate dadan û govend hate gerandin.
ERDEXAN
Newroz li kolana Kongreyê bi beşdariyeke xurt hate pîrozkirin. Li ber dirûşma ‘Bijî Newroz’ deqeyek rêz hate girtin. Rêveber û parlamenterên DEM Partiyê axivîn û diyar kirin ku ew piştgiriyê didin banga civaka demokratîk a Rêber Apo. Piştî ku agirê Newrozê hate dadan pîrozbahî bi dawî bû.
SEMSÛR
Li Semsûrê piştî erdheja 6’ê Sibatê yekemcar Newroz hate pîrozkirin. Hevberdevkê HDK’ê Alî Kenanoglû, Parlamenterê Mersînê yê DEM Partiyê Alî Bozan, aktîvîstên TJA’yê, endamên Meclîsa Dayikên Aştiyê beşdarî pîrozbahiyê bûn. Qad bi alên kesk, sor û zer hate xemilandin û jin û ciwan bi kincên neteweyî tevlî bûn.
Agirê Newrozê hate dadan û govend hate gerandin.
Pîrozbahiyê bi hunera Hîvda Goksel dewam kir. Çalakî bi gerandina govendê bi dawî bû.
