Li kûrahiya çiyayên Kurdistanê dengê govenda azadiyê bilind dibe. Agirê azadiyê yê li vî warî gur dibe, hemû rengan di nava xwe de vedihewîne. Yên ku li dora wî agirî kom bûne meşvanên heman dozê ne, rêwiyên heman rê ne. Ev govenda azadiyê ya li çiyayên Kurdistanê tê gerandin sînoran derbas dike û digihêje hemû dilxwazên azadiyê. Ji gelek deverên cîhanê jin û mêr ên ciwan tevlî vê govenda azadiyê dibin. Ewladê sosyalîst û esîl ê gelê Elman Thomas Johann Spiess jî li gel hevalên xwe li dora vî agirê azadiyê kom dibe. Govenda ku Thomas bi coş tevlî bû ji çiyayên Xakurkê li tevahiya cîhanê belav dibe.
Thomas Johann Spiess sala 1996’an li bajarê Mainburg ê Elmanyayê li nava malbateke lîberal ji dayik bû. Li welatekî ku kapîtalîzm lê serwer e mezin bû, lê belê ev jiyan weke jiyaneke rasteqîn qebûl nekir. Ji ber vê yekê jî di temenê xwe yê ciwan de berê xwe da sosyalîzmê. Bi meraqa xwe ya ciwantiyê timî lêkolîn kir, li bersiva pirsên xwe geriya. Ji ber vê yekê Thomas di nava koma xwendekaran de bala her kesî kişand. Ji ber têkiliyên xwe yên civakî di nava koma xwendekaran de bû yek ji wan kesan ku herî zêde tê hezkirin û lê tê guhdarîkirin. Thomas dest bi lêkolînkirina lîderên şoreşger kir ku mohra xwe li dîrokê xistin û yekemcar wê demê bala xwe çû ser Tevgera Azadiyê. Gava ku pirtûkên Rêber Apo xwend, PKK’ê hîn bêhtir bala wî kişand û ji Tevgerê bi bandor bû. Li ser vê yekê biryar da ku dest bi rêwîtiyeke nû bike.
Thomas destpêkê tevlî çalakî û mîtîngan bû û dest bi têkoşînê kir. Piştre her ku fikir û nêrînên Rêber Apo nas kir, baweriya wî hîn xurt bû û biryar da ku meşa xwe ya şoreşgerî li çiyayên azad dewam bike. Li gel ku li Elmanyayê di nava komên sosyalîst jî de bû, armanca xwe ya jiyana wekhev û azad a gelan di nava van koman de nedît. Ji ber vê yekê felsefeya Rêber Apo bala wî kişand. Bi taybetî gotina ‘Israra li ser sosyalîzmê israra li ser mirovahiyê ye’ ya Rêber Apo gelekî bandor li wî kir. Thomas ji bo jiyaneke azad û wekhev di sala 2016’an de beşdarî nava refên gerîla bû û destpêkê çû herêma Qendîlê. Thomas li nava refên gerîla navê Azad Şerger li xwe kir û bû milîtanekî çalak ê têkoşîna sosyalîst.
RÊWÎSTIYA JI ELMANYAYÊ BER BI QENDÎLÊ VE
Azad Şerger li çiyayên Qendîlê beşdarî nava perwerdeya bingehîn bû û li vir tevlî pratîka gerîla bû. Di demeke kurt de hînî jiyana gerîla bû û jiyaneke sosyalîst ji xwe re kir esas. Lewma li gelek qadan xwe bi pêş ve bir. Dest bi hînbûna zaravayên Kurdî kir û bi vî rengî bi hevrêyên xwe re diyalogên hîn dewlemend danî.
Ji bo têkoşîna çekdarî tecrûbe bike xwest biçe çeperên berxwedanê û piştî ku li Akademiya Mazlûm Dogan dema perwerdeyê qedand, derbasî qada şer a li Xakurkê bû. Bi tevlîbûna xwe ya çalak li Xakurkê beşdarî nava tîma bi tevger bû. Di sala 2021’ê de piştî ku dewleta Tirk li ser Herêmên Parastinê yên Medyayê dest bi êrîşên dagirkeriyê kir Azad jî beşdarî çeperên şer bû û derbên giran li dagirkeran xist. Gerîla Azad Şerger ku beşdarî gelek çalakiyan bû ji aliyê serweriya li qadê ve jêhatî bû.
Gerîlayê enternasyonalîst Azad Şerger xwedî kesayetiyeke demokrat û sosyalîst bû. Paradîgmaya Rêber Apo ji xwe re kir bingeha jiyanê. Hemû pirtûkên Rêber Apo xwend û ji xwe re kir esas ku bibe xwedî kesayetiyeke milîtan a pêşeng. Di demeke kurt de li nava tevgerê bi gelek wezîfe û berpirsyariyan rabû û xwe ji pratîkên herî zehmet re amade kir. Ji dîsîplîna leşkerî ti carî tawîz neda; lewma bû pêşengekî rast ê têkoşîna azadiyê.
Li herêma Xakurkê bi hişmendiya berpirsyariyek emezin beşdarî nava kar û wezîfyan bû. Di kar de hesas bû, di pîvanên rêxistinî de cidî bû û bi vî rengî milîtanekî Apoyî yê mînak bû. Êrîşên dagirkeriyê û bombardûmana li ser çiyayên Kurdistanê ji bo şoreşgerê enternasyonal Azad Şerger bû sedema hêrseke mezin. Di demekê de ku dewleta Tirk êrîşên xwe giran kiribû, şoreşgerê mezin Azad Şerger ji bo karibe derbên giran li dijmin bixe hewl da çalakiyên bi bandor pêk bîne.
BÛ SEMBOLA SOSYALÎZMA DEMOKRATÎK
Gerîla Azad Şerger ku li hemberî êrîşên dagirkeriyê bi biryardarî têkoşiya, ji bo tola hevrêyên xwe yên li tunelan hilîne amadekariya çalakiyeke mezin kir. Di 15’ê Hezîrana 2023’an de li gel hevrêyên xwe Asya Kanîreş û Koçer Medya li Xakurkê çalakiyeke bi bandor kir. Li nuqteyeke li Qada Şehîd Heqî û Şehîd Kamûran ku dagirker lê bi cih bûbûn, bi biryardariyeke mezin çalakî kirin. Di dema çalakiyê de dagirker şaş bûn ku çi bikin, di nava toz û dûmanê de man. Di vê çalakiyê de 18 leşkerên dagirker hatin kuştin û çeperên wan hatin îmhakirin. Sê gerîlayên leheng, sê lehengên mezin ên doza azadiyê tirs berdan nava dilê dijmin. Şoreşgerê enternasyonal Azad Şerger li gel hevrêyên xwe mîna birûskê ketin nava dijmin û çalakî bi ser xistin. Piştî çalakiya van sê gerîlayên leheng, artêşa Tirk bi hemû derfetên teknîkî yên li ber destê xwe êrîş bir ser çeperên gerîla. Weke ku dîn bû be bombe li her qadê barandin.
Gerîla Azad Şerger dema ku li gel du hevrêyên xwe vedikişiyan, bûn hedefa artêşa Tirk. Di encama bomabrdûmanê de şervanê enternasyonalîst Azad Şerger li gel hevrêyên xwe Asya Kanîreş û Koçer Medya şehîd bû. Şehadeta van lehengan çiqasî giran jî be çalakiya ku wan kir mohra xwe li demê xist. Hevrêyên wan hem ji çalakiya wan hem jî ji fedakariya wan hêz û tecrûbeyeke mezin wergirtin. Ew bûn dilê hevrêyên xwe, bûn sembola sosyalîzma demokratîk. Şehîd Azad Şerger da ser şopa gelek şoreşgerên enternasyonalîst ên weke Ronahî Sara, Nûdem, Şiyar, Bager, Elefterya û herî dawî Tîjda Zagros.
