Di demekê de ku Kurdên li Brîtanyayê û dostên wan ji bo parastina statuya Rojava û rakirina dorpêça li ser Kobanê hewildanên xwe yên dîplomatîk û zexta rayagiştî didomînin, ji rêveberiyên herêmî jî pêngaveke balkêş hat. Şaredarê Hackneyê Caroline Woodley, Şaredarê Enfieldê Ergîn Erbîl û Şarederê Haringeyê Peray Ahmet, ji hikûmeta Partiya Karker re ku endamên wê ne, nameyeke hevpar nivîsandin.
“BERPIRSYARIYA ME LI HEMBERÎ GELÊ KURD HEYE”
Şaredaran destnîşan kirin ku li hemberî civaka Kurd a ku li herêmên wan dijîn berpirsyar in û tundiya li Sûriyeyê û êrîşên ku gelê Kurd li Bakur û Rojhilatê Sûriyeyê dikin hedef, bi tundî şermezar kirin.
Di nameyê de hat diyarkirin ku ji ber operasyonên leşkerî yên dawî yên li Rojava û Sûriyeyê zêdetirî 155 hezar sivîl ji cih û warên xwe bûne. Her wiha hat gotin ku tevî peymana agirbestê jî şer dîsa dest pê kiriye û binpêkirinên giran ên mafên mirovan berdewam dikin.
Şaredaran bal kişandin ser wê yekê ku gelê Kurd ê ku di eniyên herî pêş ên têkoşîna li dijî DAIŞ’ê de cih girt û berdêlên giran da, îro dîsa di bin metirsiyê de ye û bang li hikûmeta Îngîlîstanê kirin ku helwesteke zelal nîşan bide.
JI BO HIKÛMETÊ BANGAWAZIYA ÇAR XALAN
Daxwazên Woodley, Erbîl û Ahmet ên ku gihandin hikûmetê wiha ne:
*Piştgiriyê bidin parastina nasnameya Kurd û hemû civakên kêmnetewe yên li Sûriyeyê.
*Binpêkirinên mafên mirovan li ber çavê rayagiştî bi eşkere şermezar bikin û soz bidin ku hûn ê piştgiriyê bidin aştiyê.
*Ji bo dawî hatina tundiyê piştgiriyê bidin muzakereyan û daxwaz bikin ku ji bo sivîlan mekanîzmayên parastinê yên berbiçav werin avakirin.
*Piştgiriyê bidin mekanîzmayên çavdêriyê yên serbixwe ku binpêkirinên mafên mirovan belge dikin û çavdêriya rêziknameyên agirbestê dikin.
BAMBOS: DIVÊ EM LONDON Û MANCHESTERÊ JI BÎR NEKIN
Li aliyê din, Parlamenterê Partiya Karker (Labour Party) Bambos Charalambous jî bi armanca parastina Rojava û mîsogerkirina statuya wê, bi Wezîrê Rojhilata Navîn ê Brîtanyayê Hamish Falconer re hevdîtinek pêk anî.
Charalambous der barê hevdîtinê de daxuyanî da û diyar kir ku wî rewşa li Rojava û bi taybetî ya li Kobanê ji Wezîr Falconer re ragihandiye û destnîşan kir ku divê ji bo parastina gelê Kurd gavên lezgîn werin avêtin.
Charalambous êrîşên ku DAIŞ û pêkhateyên cîhadî yên mîna wê li London û Manchesterê pêk anîbûn bi bîr xist û ev hişyarî da: “Valahiyeke hêzê çêdibe ku dikare rê bide hêzên radîkal ên mîna DAIŞ’ê careke din derkevin holê. Me dît ku dema tundrewî li Manchester û Londonê bi awayekî bêkontrol mezin dibe, dibe sedema çi. Ji ber vê yekê parastin, berpirsyarî û rêveberiyeke berfireh ne vebijarkek e, pêwîstiyek e. Min ev fikarên xwe rasterast bi birêz Falconer re parve kirin û ez ê parvekirina wan bidomînim. Di parlamentoyê de dostên gelê Kurd hene û em ê xebatên xwe yên lobiyê bidomînin.”
BI WEZÎRÊ TENDURUSTIYÊ RE HEVDÎTINA ‘ROJAVA’
Nûnerê MSD’ê (Meclisa Sûriyeya Demokratîk) ê Brîtanyayê Dr. Mohamed Moustafa jî bi Wezîrê Tendurustî û Karûbarên Civakî Wes Streeting, parlamenter û endamên House of Lords (Civata Lordan) re hat cem hev û der barê êrîşên li ser Rojava û dorpêça Kobanê de agahî dan wan.
Dr. Moustafa bi taybetî bal kişand ser rewşa mirovî ya li Kobanê û daxwaz kir ku hikûmet ji bo li dijî çeteyên cîhadî korîdoreke mirovî were vekirin, bikeve tevgerê. Di hevdîtinan de hat destnîşan kirin ku divê hikûmeta Brîtanyayê nêzîkatiyekê nîşan bide ku tevî gelê Kurd hemû nasnameyên cuda biparêze û li dijî pêkhateyên cîhadî gavên berbiçav biavêje.
