Tê gotin, binpêkirina mafên mirovan ên li dijî girtiyên siyasî yên li Girtîgeha bi Ewlekariya Bilind a Hejmara 1'emîn a Sîncanê gihîştine kiryarên bi rêk û pêk ku dikarin pêvajoya aştî û çareseriya demokratîk sabote bikin. Cezayên dîsîplînê yên kêfî, serdegirtina li hucreyan, bi qedexeya hevdîtin û ragihandinê re desteserkirina pirtûk û weşanan helwesta nehiqûqî ya rêveberiyê ne tenê li dijî mafên bingehîn ên girtiyan, her wiha li ser ewlekariya jiyana wan jî gefeke yekser e.
Wasiyê girtiyên siyasî Bager Sayak û Cîhat Bekîrîn, Ahmet Sayak li ser binpêkirina mafên mirovan a bi rêk û pêk û giran a li Girtîgeha bi Ewlekariya Bilind a Hejmara 1'ê ya Sîncanê ji ANF'ê re axivî û got, "Di axaftina dawî ya bi telefonê re Bager Sayak qala kiryarên rêveberiya girtîgehê kir ku dikare pêvajoyê sabote bikin û bi zanebûn rageşiyê zêde dikin. Bi rengekî kêfî û timî lêgerîn li hucreyan tê kirin, pirtûkên girtiyan têne desteserkirin, mafên bingehîn bêyî hincetan dibin mijara lêpirsînê; cezayên hevdîtin û ragihandinê bi rêk û pêk têne birîn. Ev kiryar binpêkirinên şexsî nînin. Hewldanek e ku ji bo têkbirina pêvajoya dîrokî ya li Tirkiyeyê têne kirin.
Çawa ku li derve hin aktorên siyasî hewl didin pêvajoyê sabote bikin, li zindanê jî hin rêveber bi heman zîhniyetê tevdigerin."
'GIRTÎ LI GEL BINPÊKIRINAN JÎ BI BERPRSIYARÎ TEVDIGERIN'
Sayak anî ziman ku girtiyên siyasî yên li girtîgehan li gorî hesasiyeta pêvajoyê bi zanebûn di nava bêçalakîtiyê de li ber xwe didin û got, "Girtî ji bo nekevin xefika provokasyonan û zerar li pêvajoyê nebe, îradeyeke mezin nîşan didin. Lê belê ev helwesta bi berpirsyariyê nayê wateya rewakirina zext û bêhiqûqiyê. Em malbat jî bi heman berpirsyariyê tevdigerin. Ji bo zerar li pêvajoyê nebe em jî dengê xwe bilind nakin, lê belê ev nayê wê wateyê ku sebra me bê dawî ye. Eger li girtîgehan bêhiqûqî dewam bikin, em ê li pêşiya Wezareta Edaletê çalakiyên demokratîk û rewa lidar bixin. Ji bo girtiyên xwe em ê lêgerîna li edaletê mezin bikin."
'BI RENGEKÎ KÊFÎ CEZAYÊN DÎSÎPLÎNÊ TÊNE BIRÎN'
Bi dewamî Sayak diyar kir ku cezayên dîsîplînê yên kêfî li girtiyên siyasî têne birîn û got, "Herî dawî îtirazên li hemberî cezayên dîsîplînê yên li 27 girtiyan hatibû birîn, hatin redkirin. Bi taybetî mafên ragihandinê yên girtiyan têne binpêkirin. Name têne reşkirin, bersiv nayên dayin. Meha Cotmehê min nameyek ji heft rûpelan ji Bager Sayak re şand, lê belê di 3 rûpelên nameyê de bi qasî bîst hevok hatin reşkirin û bi vî rengî radestî wî kirin. Ne orjînal lê kopiya nameyê ji girtiyan re tê dayin."
'DIVÊ RAYA GIŞTÎ BI BERPIRSYARÎ RABE'
Ahmet Sayak têkildarî binpêkirinên mafên mirovan ên li girtîgehan bang li parlamenterên DEM Partiyê û heyetên pêwendîdar jî kir û got, "Divê tavilê serdana Girtîgeha bi Ewlekariya Bilind a Hejmara 1'emîn a Sîncanê bikin. Divê kiryarên li girtîgehê li cih lêkolîn bikin û dest li helwesta kêfî ya îdareyê werbidin. Kiryarên kêfî yên îdareyê jiyana girtiyan dixe nava rîskê. Ev yek sûcê li dijî mirovahiyê ye. Raya giştî li hemberî vê dorpêça bêdeng divê bi berpirsyarî tevbigere. Di rewşa heyî de ne tenê mafên girtiyan her wiha jiyana wan jî di xeteriyê de ye."
