Li Goristana Avcilar a navçeya Avcilar a Stenbolê, ji bo karsaz Savaş Buldan, Adnan Yildirim û Haci Karay ên ku ji aliyê JÎTEM’ê ve hatin revandin û kuştin, di 33’yemîn salvegera mirina wan de bîranînek hat lidarxistin.
Hevberdevka Kongreya Demokratîk a Gelan (HDK) Meral Daniş Beştaş, endama Şandeya Îmraliyê ya Partiya Wekhevî û Demokrasiyê ya Gelan (DEM) Pervîn Buldan, Hevserokê Giştî yê DEM Partiyê Tuncer Bakirhan, endamên Dayikên Aştiyê û gelek kesên din beşdarî bîranînê bûn.
Keça Adnan Yildirim, Leyla Yildirim ku di bîranînê de axivî, destnîşan kir ku ew ê ji bo kesên ku hatine windakirin û kuştin heta dawiyê têkoşîna xwe bidomînin.
Meral Daniş Beştaşê kesên ku hatine kuştin bi bîr anî û got ku bêedlatî berdewam dike û sûcdar hîn jî tên parastin. Meral Daniş Beştaşê destnîşan kir ku tevî Pêvajoya Aştî û Civaka Demokratîk jî edalet nehatiye bicihanîn û got: “Kujer nehatine darizandin. Li vî welatî, em hîn jî li ser windakirin û kuştinên kiryarnediyar diaxivin ji ber ku dewlet naxwaze. Ger bixwesta, tu sûc bê ceza nediman. Îro ne tenê bîranînek e. Di vê roja xemgîniyê de, keçek bedew (Zelal Buldan) ji dayik bû. Ez dixwazim spasiya we bikim ku hûn li vir in û ez rojbûna wê pîroz dikim.”
PERVÎN BULDAN: AŞTIYEKE BIRÛMET DIVÊ
Pervîn Bûldan got: “Sê tişt ji me re hiştin. Ya yekem, Zelal; ya duyem, cilên xwînî; ya sêyem, rûmet. Dadgehkirin tune bû! Tansu Çiller ku got ‘Hem yê ku gule avêt û hem jî yê ku ew wergirt,’ nehatin darizandin. Mehmet Agar ku got ‘Heke ez tûxleyê bikişînim, dewlet dê hilweşe,’ nehat darizandin. Berevajî vê, ew hatin parastin û wekî qehreman hatin îlankirin. Û wan kuştinan berdewam kirin. Em bi dewletekê re rû bi rû ne ku bi hezaran kujeran diparêze ku kiryarên wan diyar in lê hatine beraetkirin. Di Wezareta Dadê de Daîreya Lêkolîna Sûcên Kiryar Nedîyar hatiye damezrandin. Divê ev yekîne her kuştinê lêkolîn bike. Ev dewlet xwedî wê berpirsiyariyê ye ku kuştinên ku di demên berê de zelal bike. Ji ber vê yekê, em daxwazeke wisa ji Wezareta Dadê dikin. Em di pêvajoyeke aştiyê de ne. Bê guman, divê ev aştiyek birûmet be. Soza me ya aştiyê ji Besna Tosun re heye ku li hestiyên bavê xwe diğere û ji bo Sirri Sureyya Onder. Lê em aştiyeke birûmet dixwazin. Aştiyeke ku tê de kujer bên darizandin û Komîsyona Heqîqetê û Hevrûbûnê bê damezrandin.”
BAKIRHAN: EM KUJERAN NAS DIKIN
Tuncer Bakirhan got: “Tenê sûcê van hevalan Kurdbûna wan bû. Bi hezaran hevalên me ji ber ku Kurd bûn hatin kuştin. Em kujeran baş nas dikin. Em kesên ku di wan korîdorên tarî de fermana komkujiyan dane jî nas dikin. Bes e! 33 sal derbas bûn. Niha, ji kujeran hesab bipirsin û bila malbat aramiyê bibînin. Pêvajoya aştiyê li ser rûbirûbûna bi van komkujiyan, anîna wan ber dadgehê ye. Ger ev nebe, em bi rastî nikarin bibêjin ku me aramî ava kiriye. Niha ku Wezîrê Dadê dest bi dosyeya Gulistan Dokûyê kiriye, divê ew van dozan jî derxe holê û sûcdaran nîşan bide. Em soz didin malbatên bi hezaran qurbaniyên kuştinên nediyar ku sûcdar dê rojekê werin eşkerekirin. Û em soz didin ku em ê vê pêvajoyê bi darizandineke rastîn li ber dadgehan biqedînin. Bila mirî bi miriyên xwe re bimînin û em bibêjin em ê aştiyê bikin; ev ne aştî ye. Tiştê ku gelê Kurd ji pêvajoyê hêvî dike, eşkerekirina sûcdarên kuştinên nediyar e.”
Bîranîn piştî duayan bi dawî bû.
