Konseya Giştî ya Tevgera Şoreşa Yekbûyî ya Jinan (KBDH) bi wesîleya salvegera komkujiya Pirsûs û şoreşa Rojava daxuyaniyek weşand.
Konseya Giştî ya KBDH’ê got, “Tam beriya 10 salan roja 20’ê Tîrmehê li Pirsûsê 33 sosyalîst, şoreşger, anarşîst, welatparêz ku ji jin, mêr, ciwan, dayik, bav û hevrêyan pêk dihatin, bi hevkariya DAÎŞ-MÎT’ê hatin qetilkirin. Em hemû hevrêyên di komkujiyê de jiyana xwe ji dest dan bi rêzdarî û minetdarî bi bîr tînin û soza xwe ya dilsoziya bi bîranînên wan re dubare dikin.
Wan ji sembola berxwedana Kobanê Arîn Mîrkan û ji Sîbel Bulut a ku dibêje ‘şoreşa Rojava şoreşa min e, armanca şoreşger pêkanîna şoreşê ye’ îlham girt. Bi komkujiya Pirsûsê re hate xwestin ku têkoşîna şoreşa yekbûyî ya gelan û jinan bê tunekirin. Bi komkujiya Pirsûsê re hate armanckirin ku pira têkoşînê ya ji Tirkiyeyê heta Kurdistanê bi temamî were têkbirin.
Em 33 Rêwiyên Hêviyê ji bîr nakin. Em hevrêyên xwe yên jin ên li Pirsûsê me winda kirin, ji bîr nakin. Em Polen, Ezgî, Buşra, Nazegul, Aydan Ezgî, Ferdane, Ece, Nuray, Duygu û Nazli ji bîr nakin. 33 Rêwiyên Hêviyê yên ku çûn Xaka Şoreşa Rojava, ji bo hemû gelên bindest ên cîhanê û jinan bûn îlham.
Em dizanin ku komkujiya Pirsûsê ne sûcê ewilî, ne jî yê dawî yê desthilatdaran e. Îro faîlên Komkujiya Pirsûsê hîna li ser desthilatdariyê ne.”
KBDH’ê destnîşan kir ku wan timî li dijî asîmîlasyon, tundiya zayendî, komkujiyên li hemberî gelên Elewî û Durziyan, êrîşên li ser azadî û hêviyan têkoşîn kir û hîn jî têdikoşin û got, “Weke şoreşgerên jin ên ji Tirkiye û Kurdistanê, sosyalîst, welatparêz, femînîstên sosyalîst û komunîstan em li dijî faşîzma AKP-MHP’ê û dîktatoriya faşîst a Tirk têkoşîna azadî û wekheviyê ya jinê bilind dikin.
Bi gotina dawî ya jinên xwe yên rêwiyên hêviyê ‘Ji Arînê heya Sîbelê em ber bi serketinê ve diçin…”
