Kongreya Civakên Demokratîk a Kurdistaniyên li Ewropayê (KCDK-E) û Tevgera Jinên Kurd a li Ewropayê (TJK-E) têkildarî Festîvala Çanda Kurd a Navneteweyî ya 34’emîn daxuyanî weşandin ku bi dirûşma “Bi Rêbertiya azad ber bi civaka demokratîk ve” li bajarê Dortmundê hate lidarxistin.
Di daxuyaniyê de ku bi sernavê “Em spasiya gelê xwe û dostên xwe dikin ku ji bo Festîvala Çanda Kurd a Navneteweyî ya 34’emîn seferber bûn” hate ragihandin ku festîval bi tevlîbûna bi deh hezaran kesî bi coş derbas sbû. Hate destnîşankirin ku festîval li dora îradeya jiyana azad, nasname, çand û zimanê gelê Kurd kombûneke girîng bû.
Di daxuyaniyê de hate bibîrxistin ku festîval diyarî Şehîdên Azadiyê yên Kurdistanê hate kirin, lewma bû nîşaneya xurtkirina têkoşînê û kombûna li dora nirxên şehîdan.
Bi dewamî hate gotin, “Bi deh hezaran kesên beşdarî festîvalê bûn dilsoziya xwe ya bi Rêber Apo re, biryardariya xwe ya ji bo têkoşîna têkildarî azadiya fîzîkî ya Rêber Apo nû kirin.
Tevlîbûna jin û ciwanan a bi kincên neteweyî ya li Festîvala Çanda Kurd a Navneteweyî ya 34’emîn, careke din raxist pêş çavan ku di pêvajoya aştî û civaka demokratîk de li dijî qirkirina çandî ew pêşengên berxwedana çandî ne.
Festîvala Çanda Kurd a Navneteweyî ya 34’emîn bû nîaşneyeke xurt a vê îradeyê. Kombûna li hev a bi deh hezaran mirovî ya li qada festîvalê îradeya gelê Kurd a ji bo xwedîderketina li ziman, çand û nasnameya xwe, biryardariya ji bo jiyana bi nirxên xwe û xwedîderketina li rêxistiniya xwe careke din nîşan da.
Li ser vê bingehê em spasiya gelê xwe, dostên xwe, sazî û meclîsên xwe dikin ku ji meha Tebaxê û vir ve beşdarî festîvalên çandê yên li Kanada, Îngilistan, Belçîka, Swîsre û welatên Skandînavyayê bûn.”
