Koordînasyona Civaka Êzidî ya li Ewropayê (KCÊ-E) bi wesîleya Cejna Çarşema Sor daxuyaniyek weşand.
Daxuyaniya KCÊ-E’yê bi vî rengî ye:
“Em weke Saziya Civaka Êzidî ya li Ewropa, Cejna ‘Çarşema Serê Nisanê’, li Êzidiyên welat û li seranserî cîhanê, li gelê Kurdistanê û tevahiya mirovahiyê pîroz dikin. Cejna Çarşema Serê Nîsanê, bi navên ‘Cejna Sersalê’, ‘Cejna Tawisî Melek’, ‘Bûka Salê’ û ‘Roja Afirandina Cîhanê’ jî tê naskirin.
Ev cejn, cejna civaka Êzidî ya herî mezin û watedar e, ji dîroka qedîm ve tê pîrozkirin. Cejna ‘Çarşema serê Nîsanê’ li gorî bîr û baweriyên civaka me, roja afirandina cîhanê, peydabûna xêr û bereketa axê ye. Çarşema Serê Nîsanê destpêka aştî û aramiyê ye. Xweza reng diguhere di wê demê de.
Li gorî mîtolojî û baweriya Êzîdiyan, berê cîhan hemû av bû. Bi daketina milyaketên Xwedê re cîhan tê meyandin. Wê rojê Tawisî Melek ji ezmana dihat û nazilî erdê bûye. Lewma jî li gelek deveran wekî cejna Tawisî Melek tê pîroz kirin. Şêxadî di gotareke xwe de wiha dibêje,
‘Çarşem rojeke fadil e.
Tawisî Melek afirandiye ji eşq û dil e.
Bar tê nebê kesê ku î xafile.
Deng yek e û hezar reng e.’
Di vê cejnê de, basimbar (ji benê bi rengê kesk û sor û zer) tê çêkirin. Wateya basimbar xêr, bereket, astengkirina qeza û belayê ye. Basimbar li destê jin, mêr, qîz, zarokan, zada, her tiṣtekî pîroz û navdar ve tê girêdan. Meha Nîsanê, hem destpêka şînbûna xwezayê ye û hem jî bûka salê ye. Di vê cejnê de, baqên kûlîlkên reng û reng ji xemla Nîsanê bi her ciyekî pêwist û girîng ve têne daliqandin. Dîsa, di meha Nîsanê de Êzidî bûka dernaxin, ji ber ku meha Nîsanê bi xwe bûka salê ye. Cejna Çarşema Serê Nîsanê di heman demê de xemla çanda Kurdî û baweriya me ye.
Êzidiyên dilsoz!
Divê ev çanda qedîm ji aliyê civaka me ve were parastin. Pêwîste em weke civak û sazî di vê têgihiştin û zanistiyê de bin, çanda me û baweriya me di bin xeteriyeke mezin de ye. Eger em li nirxên xwe xwedî dernekevin, kes nayê me naparêze, rêveberiyê ji me re nake û azadiya me bi hêsanî diyarî me nake. Em neçar in tifaqa xwe çêkin, di her milî de hêza xwe xurtir bikin û çarenûsa xwe bi destê xwe binivisînin.
Ji bo avakirina Êzdîxan û azadiya civaka me derfetên heyî ne hindik in û di dîroka civaka me de kêm hatine bidestxistin. Pêwiste em van rojên zêrîn baş binirxînin û ji bo serkeftinê hemû hêza xwe seferber bikin.
Bi taybetî pêwîste civaka Êzidî ji her kesî zêdetir xwedî li peyama Rêber Apo ya ji bo Aştî û Civaka Demokratîk derbikevin û pêşengtiyê ji vê pêvajoyê re bikin. Divê, ji bo nasandin û parastina Bawerî û Çanda Êzidiyatiyê, civaka me li kuderê dijî bila bijî divê bi ruhê seferberiyê li erkê xwe xwedî derkeve û li ser bingehê civaka demokratîk xwe bi rêxistin bike. Dîsa, divê em weke civaka Êzidî û saziyê wê bi hemû hêza xwe ji bo azadiya fîzîkî ya Rêberê Gelê Kurd têkoşina xwe xurtir bikin.
Em hêvidar in û bangawaziyê li tevahiya gelê xwe û dostên civaka xwe dikin ku bi girseyi tevli pirozbahiya Cejna Çarṣema Serê Nîsanê bibin. Bi vê bîr û baweriyê em car din cejna Çarşema Serê Nîsanê li civaka Êzidî, li gelê Kurdistanê û li tevahiya mirovahiyê pîroz dikin.”
