Neteweyên Yekbûyî (NY) li bakurê Xezeyê bi rengekî fermî xela ragihand. Klasîfîkasyona Ewlekariya Xurekê ya NY’ê (IPC) diyar kir ku zêdeyî nîv milyon mirov di asta ‘felaketê’ de bi birçîbûnê û rîska mirinê re rû bi rû ne.
Serokwezîrê Îsraîlê Benyamin Netanyahu ev daxuyanî weke ‘dereweke bê şerm’ pênase kir û got, eger Hamas şert û mercan qebûl neke wê Xeze bi temamî tine bibe.
Di nameya vekirî de ya li rojnameya Mirrorê hate weşandin, 12 kesên ji Holokostê rizgar bûn işaret bi rewşa mirovî ya li Xezeyê kirin.
Kesên ji Qirkirina Yahûdiyan rizgar bûn, êrîşên Hamasê, dîlgirtina mirovan û xeteriya ku li ser mirovan çêdike, şermezar kirin.
Di nameyê de her wiha hişyarî ji Îsraîlê re jî hate dayin û hate gotin, “Mafê parastinê divê nebe sedem ku zarok hêdî hêdî bimirin.”
Di nameyê de hate gotin, “Em baş zanin bê birçîbûn çawa zarokan qels dike û dihelîne.”
Bi dewamî di nameyê de hate gotin, “Em çalakiyên Îsraîlê yên li Xezeyê bi odeyên gazê yên Naziyan nadin ber hev. Di 7’ê Cotmehê de qetilkirina Yahûdiyan li vê xakê me xist nava tirsê û em êşa Îsraîlê fêhm dikin.”
HIŞYARIYA SERKETINA PYRRHUS’Ê
Di nameyê de her wiha hişyarî hate dayin ku hewldana têkbirina Hamasê bi travmaya şer û birçîbûnê ya li Xezeyê re dikare bibe sedema lêgerîneke nû ya tolhildanê û ev jî dikare ji bo Îsraîlê bie ‘Serketina Pyrrhusê’.
BÎLANÇO
Di êrîşên 7’ê Cotmehê yên Hamasê de li Îsraîlê 1.219 kes hatin kuştin.
Di êrîşên Îsraîlê de jî li Xezeyê tê gotin ku herî kêm 62.192 kes hatin kuştin.
