Komîsyona Ziman, Çand û Hunerê ya Partiya Wekhevî û Demokrasiyê ya Gelan (DEM Partî) li Navenda Kongreya Amedê ya Çandê bi saziyên ziman re civiya.
Di civînê de nêrîn û pêşniyar hatin komkirin ku wê ji “Komîsyona Hevgirtin, Xwişk-Biratî û Demokrasî” re were şandin.
Hevberdevkên komîsyonê Cemîle Turhalli û Heval Dilbihar bal kişandin ser înkarkirina ziman, çand û nasnameya Kurdî û diyar kirin ku zimanê dayikê divê weke fermî were qebûlkirin.
Hevberdevka HDK’ê Meral Daniş Beştaş jî di civînê de axivî û got, zimanê Kurdî divê bêhincet di rojeva komîsyonê de cih bigire.
Her wiha Meral Daniş Beştaş anî ziman ku komîsyona li meclîsê dibe di rojên pêşiya me de bi Rêber Apo re hevdîtinê bike û got, “Bi Birêz Ocalan re hevdîtin nekirin, ne li gorî ruh, feraset û tarzê pêvajoyê ye. Me guhdarî gelek akademîsyenan kir, her kes xwedî nêrîneke hevpar e ku divê Birêz Ocalan were guhdarkirin.”
Civîn ji çapemeniyê re girtî dewam kir.
