Konseya Rêveber a Kongreya Neteweyî ya Kurdistanê (KNK) têkildarî komkujiya ku çekdarên desthilata demkî ya Şamê ya li Dêr Hafirê kir, daxuyaniyek da.
Daxuyanî bi vî rengî ye:
“Çeteyên girêdayî Hikumeta Şamê ku desteka xwe ji dewleta Tirk jî digrin, ev demeke li rojhilatê Helebê êrîşê Dêr Hafir û derdera wê dikin. Li gel rewşa şer rawestinê û li gel hemî hişyariyan jî, van êrîşên xwe dewam dikin. Di êrîşên xwe de gund, bajar û gelê herêmê hedef digrin. Herî dawî roja Şemiyê (20 Îlon 2025) saet derdora 19.00’an komên çete, sûcek din li dijî şêniyên wê deverê kirin. Komên çete yên girêdayî hikumeta Şamê li gundê Um Tîna yê Dêr Hafirê yê gundewarê rojhilatê Helebê, bi dronan, piştre jî bi obîsan rasterast malên sivîlan kirin armanc. Di encamê de jin û zarok jî di nav de 7 sivîl şehîd bûn û 4 jî birîndar bûn. Ev sûc ji rêze komkujî û binpêkirinên sîstematîk yên ku çete li Surîyê pêktînin, yek ji wane.
Armanca vê êrîşê şkênandina îradeya gele, bilavkirina tirsê di nava sivîlan de ye. Em vê komkujiya hovane bi tundî şermezar dikin. Di heman demê de em bang li civaka navneteweyî û hemî hêzên peywendîdar dikin ku li seranserê Surîyê dijê kumkujî û sucên şer derkevin û hewldanên jibo avakirina Suriyeke demokratîk destek bikin.
Em ji malbatên şehîdên vê komkujiyê re sersaxiyê û ji birîndaran re şîfaya lezgîn dixwazin.”
