Ji bo ji kadroyên pêşeng ên PKK’ê Alî Haydar Kaytan û Riza Altûn li paytexta Îngilistan Londonê bîranîneke girseyî hate lidarxistin.
Bîranîn bi pêşengiya Meclîsa Gelê Kurd a Brîtanyayê li Navenda Civaka Kurd a li Londonê pêk hat û nûnerên gelek saziyan, xizmên Altûn, bi sedan kes tevlî bûn. Li salona bîranînê wêneyên Altûn û Kaytan hatin daliqandin.
Di şexsê Altûn û Kaytan de ji bo bîranîna şehîdên Meha Gulanê deqeyek rêz hate girtin. Piştre Hevserokên Meclîsa Gelê Kurd a Brîtanyayê axaftin hate kirin. Hevserokan anîn ziman ku bersiva herî mezin a ji şehadeeta Alî Haydar Kaytan û Riza Altûn re bê dayin, xwedîderketina li mîrateya wan e û gotin, “Ji hevrêyên herî hêja yên Serok Apo hevrê Riza Altûn û Alî Haydar Kaytan bûn nefer û ruhê têkoşîna şoreşgerî ya 52 salan. Wezîfeyên mezin ji me hemûyan re hiştin. Xwedîderketina li mîrateya wan serxistina têkoşîna wan e.”
Di bîranînê de sînevîzyonek li ser jiyana Altûn û Kaytan hate nîşandan. Ji xizmên Riza Altûn ên li Londonê dimînin Xidir Altûn jî gel silav kir û soza xwedîderketina li bîranîna wan da.
Piştre nûnerên MLKP, Partîzan û MKP Brîtanyayê axivîn, anîn ziman ku Altûn û Kaytan nirxên mezin tevlî têkoşîna şoreşgerî kirin û mîrateyeke mezin a ji hemû rêxistinên şoreşger re hiştine.
Di bîranînê de helbestên li ser Altûn û Kaytan hatin xwendin û siyasetmedar Sefkan Kobanê û Alî Poyraz axivîn.
Bîranîna ku tim û tim dirûşmên “Şehîd namirin”, “Bijî Serok Apo” lê hate qîrîn bi helbesta ji dengê Alî Haydar Kaytan bi dawî bû.
