Komîteya Ekolojiyê ya KCK’ê têkildarî şewata ku şeva 25’ê Tîrmehê li çiyayê Avyer ê li bajarê Sine yê Rojhilat derketî, daxuyanî da. Komîteyê Hemîd Muradî bi bîr anî û ev tişt got:
“Şeva 25’ê Tîrmehê li bajarê Sine li çiyayê Avyer şewatek derket. Di encama şewatê de nêzî 20 hektar dar û daristan şewitîn. Jîngehparêzên Kurd ji bo vemirandina şewatê dikevin dewrê. Di encama vemirandina şewatê de jîngehparêzê Kurd Hemîd Muradî jiyana xwe ji dest dide û 4 jîngehparêz jî birîndar dibin. Em wekî Komîteya Ekolojiyê ya KCK’ê ji malbata Hemîd Muradî re sersaxî û ji birîndaran re şifa dixwazin.
Di salên dawî de li Rojhilatê Kurdistanê hem bi encamên polîtîkayên dewletê, hem jî ji aliyê kesên rantxwar ve gelek caran şewatên daristanan çêdibin. Li hemberî van şewatên daristanan jîngehparêzên Rojhilatê Kurdistanê her tim di nav tevger û têkoşînê de bûn. Di encama van têkoşînan de gelek caran hatine girtin û qetilkirin. Yek ji van kesan jî Şerîf Bacor e. Şerîf Bacor û sê hevalên xwe dema xwestin şewata li çiyayên Merîwanê bivemirînin, jiyana xwe ji dest da. Şerîf Bacor wek sembola têkoşîna jîngehî ya Rojhilatê Kurdistanê tê dîtin. Hemîd Muradî jî li ser şopa Şerîf Bacor meşiya, ji bo parastina jîngeha Kurdistanê bi canbexşiyane tevgeriya û jiyana xwe ji dest da. Di roja me de gelek kes bi rehetî, bi erzanî û bê xem dev ji welatê xwe berdidin û direvin diçin derveyî welat. An li ser sînoran tên qetilkirin, an di behran de dixeniqin. Li hemberî vê yekê Hemîd Muradî, ji bo dar û daristan welatê wî neşewite jiyana xwe ji dest dide. Ev seknek pir bi rûmet û bi nirx e.
Ji ber vê yekê jî em Hemîd Muradî wek şehîdê têkoşîna jîngehparêziya Kurdistanê dibînin. Şerîf Bacor û Hemîd Muradî wek pêşengên têkoşîna jîngehî wê her tim werin bibîranîn. Têkoşîna jîngehî têkoşînek welatparêziyê ye. Rêber Apo dibêje welatparêziya herî bi wate jîngehparêziya welat e. Ji bo bîranînên Hemîd Muradî û Şerîf Bacor divê têkoşîna jîngehî were bilindkirin. Ev têkoşîn divê bi çend dostan ve neyê bisînorkirin. Divê jîngeha civakî yan jî jîngeha komalgehî were pêşxistin. Jîngehparêzên komalgehî li hemberî polîtîkayên dewletperest, desthilatperest û sermayedarî, av, ax, dar û daristanên xwe bi kom, komale û bi komînan biparêzin û bixin xizmeta civaka demokratîk.”
