Li gorî AFP’ê, li herêmên ku Elewî li peravên rojavayê Sûriyeyê dijîn, ji aliyê komên çekdar ên girêdayî HTŞ’ê ve komkujiyên mezin hatin kirin.
Elewiyê bi navê Rihab Kamal ê ku li bajarê Baniasê dijiya, diyar kir ku ji bo parastina xwe û malbata xwe ew du roj di serşokê de xwe veşartî bû û diyar kir ku ew bi saya malbatek Xirîstiyan karîne xwe rizgar bikin. Kemal got ku dema ew ji taxê derketine li kolanan rastî gelek cenaze hatine.
Li gorî Navenda Çavdêriya Mafên Mirovan a Sûriyeyê, ji roja Pêncşemê ve 745 sivîlên Elewî hatine kuştin.
Semîr Heyder ê ku ew jî li Banîasê dijî, berî ku çekdar bigihijin wî karî bireve, lê belê du bira û birazayên wî hatin kuştin. Heyder got, “Eger ez pênc deqeyên din li bendê bûma, ez ê jî bihatama kuştin” û anî ziman ku êrîşkaran zilaman birine ser banan û înfaz kirine.
Li Lazqiyê jî heman bûyer pêk hatin. Cenazeya Midûrê Navenda Çandê Yasser Sabbuh jî li ber derê malê hat dîtin. Hat ragihandin ku hin cenaze avêtine deryayê.
Şêniyekî bajarokê Ceble, diyar kir ku ev 4 roj in ew bê elektrîk, av û xwarin in û newêrin derkevin derve û got, “Ji malbat û hevalên min zêdeyî pêncî kes hatin qetilkirin. Cenaze bi dozeran rakirin û li gorên komî veşartin.”
Elewiyên ku reviyan welatê cîran Lubnanê daxwaza parastina navneteweyî kirin.
