Di 15’ê Sibata 1999’an de li dijî Rêber Apo komployek navneteweyî hatibû lidar xistin. Tevî ku 27 sal derbas bûn jî, 15’ê Sibatê hîn jî ji hêla gelê Kurd ve hem wekî xalek werçerxê û hem jî wekî dîrokek ku têkoşînê ji nû ve teşe digire tê dest girtin.
Di daxuyaniyên ku di salvegera komployê de hatin dayîn de hat destnîşankirin ku armanca vê pêvajoyê tasfiyekirina gelê Kurd û tevgera azadiyê bû. Her wiha behsa nerazîbûnên civakî û berxwedana gel a li dijî komployê hat kirin. Bi wesîleya salvegera komployê gerîlayên HPG û YJA Starê ji ANF’ê re axivîn.
BI KOMPLOYÊ RE STÛNÊN BINGEHÎN ÊN PARADÎGMAYÊ HEDEF HAT GIRTIN
Gerîlayê HPG’ê Brûsk Ehmed diyar kir ku komploya 15’ê Sibatê ya li ser Rêber Apo bi destê hêzên tarî û emperyalîst ên ku dixwazin serweriya xwe di Rojhilata Navîn de pêk bînin hatiye kirin û got, “Ev komplo wekî mûdaxaleyekê li Rojhilata Navîn hat kirin. Ev komplo rasterast Rêbertiyê me hedef girt. Ji ber vê yekê, em vê komployê şermezar dikin û bi zelalî dibêjin ku em ê heta dawiyê ji bo vala derxistina vê komployê têbikoş in. Her çend hûrgiliyên çawaniya pêk hatina komploya 15’ê Sibatê, qonaxên wê û hêzên têkildar pirsên girîng bin jî, pirsek bingehîntir heye: Çima qewimî? Çima Rêberê me hedef hat girtin, ne rêberê gelek din? Çima li ser vê axê hat pêkanîn, ne li dewletek din? Yek ji sedemên sereke yên hedef girtina Rêberê me parastina ‘xeta jinên azad’ û avakirina artêşeke jinan bû. Ji ber ku ev yek ji stûnên bingehîn ên paradîgmaya ku ji hêla Rêber Apo ve hatiye pêş xistine.”
Gerîla Brûsk Ehmed komploya li dijî Rêber Apo mîna êrîşeke li dijî çanda xwedawend a dayikê pênase kir û wiha domand, “Êrîş û komploya li dijî Rêberê me armanc dikir ku di nava mirovahiyê de şikestinek mezin pêk bîne. Ji ber vê yekê, em bi zelalî dibêjin: Ev êrîş û komploya li dijî Rêberê me bi tevahî nayê qebûlkirin. Wekî şoreşger, ku li ser bingeha çand, exlaq û ramanên Rêberê xwe dimeşin, em vê dibêjin: ji vê gavê û pê ve çi dibe bila bibe, em ê xebat û têkoşîna xwe ji bo avakirina xwişk-biratiya gelan û neteweyek demokratîk li Kurdistanê, li derveyî Kurdistanê û li Rojhilata Navîn bidomînin. Divê kes nekeve nava xeyal û xewnan. Kes nikare êrîşî vê paradîgmayê û vê felsefeyê bike û îdia bike ku xwişk-biratiya gelan, wekhevî xelet e; nirxandinên bi vî rengî bê bingeh û şaş in.
Dibe ku em bi awayekî fîzîkî bi Rêberê xwe re nebin; lê belê, raman û felsefeya Rêbertî dê her tim di hiş û dilê me de be. Wekî milîtanên vê tevgerê, em ê hewl bidin û têbikoşin da ku vê armancê û xwişk-biratiya gelan li Rojhilata Navîn belav bikin; vê raman û felsefeyê di nav gelê Kurd, gelên herêmê, hemû neteweyên ku li Rojhilata Navîn dijîn û gelên li derveyî Rojhilata Navîn de berfireh bikin û bigihîjin armanca xwe. Em careke din diyar dikin; em komploya 15’ê Sibatê şermezar dikin. Em soz didin ku heta nefesa xwe ya dawî têbikoşin heta ku em vê komployê têk bibin û bi awayekî fîzîkî bi Rêberê xwe re bibin yek. Em şehîdên ku bi dirûşma ‘Hûn Nikarin Roja Me Tarî Bikin’ çalakî pêkanîn, bibîr tînin û soza xwe careke din dubare dikin.”
‘DI ŞEXSÊ RÊBER APO DE XWESTIN TEVAHIYA GELÊ KURD TUNE BIKIN’
Gerîlaya YJA-Starê Zîlan Aydin Tûran jî anî ziman ku di şexsê Rêber Apo de komplo li dijî tevahiya gelê Kurd hate pêkanîn û wiha axivî, “Plana li dijî Rêber Apo ew bû ku hemû gelê Kurd tune bike, wan bêhêz bike û gelekî ku tenê xizmeta berjewendiyên wan bike, biafirînin; armanc ew bû ku her kes teslîm bibin. Lê belê, ev komplo ji destpêkê ve têk çû. Tewra dema ku Rêber hate girtin jî, gelê Kurd bi ruhê xwe yê neteweyî û hişmendiya xwe ya fedaî, bû yek û rabû ser piyan û li dora Rêber Apo çemberek ji agir çêkir. Bi sedan mirov û hevalên me laşên xwe ji bo Rêbertî dan ber agir. Ev helwest nîşandaneke mezin a hêz û îradeyê bû.
Li dijî komploya ku salên dirêj in didome, Rêber Apo tu carî dev ji helwesta xwe berneda. Ji her alî ve têkoşîn didome. Çi dibe bila bibe, em ê têkoşîna xwe ya ji bo têk birina vê komployê bidomînin. Armanca me zelal e; heta ku Rêberê me ji çar dîwarên Îmraliyê azad nebe, em ê paşve gav neavêjin. Bê guman hin pêşketin û guhertin pêwîst in; ev ne mecbûrî ne, pêdivî ne. Lê belê, heta ku Rêberê me ji girtîgeha Îmraliyê azad nebe û em wî bi çavên xwe nebînin, em ê tu carî dev ji têkoşîna xwe bernedin. Ev dê çalakiya me ya îradeya herî mezin be ji bo vala derxistina komployê. Em careke din ji bo vê armancê soz didin; em ê tu carî paşve gav neavêjin heta ku azadiya fîzîkî ya Rêber Apo neyê misogerkirin.”
