Îro saet 15.00’an li navenda Şengalê bi pêşengiya Rêveberiya Xweser a Şengalê meşeke girseyî li dijî komployên 9’ê Cotmehê hate lidarxistin.
Hemû sazî û rêxistin û pêkhateyên Rêveberiya Xweser jî tevlî meşê bûn. Di meşa li ber medreseya Zarîfe Osê destpê kir û heta Meclisa Gel dewam kir de bi sedan posterên Rêber Apo hatin hilgirtin.
Di meşê de jin pankarteke mezin a wêneyên Erdogan, Mesûd Barzanî û Mistefa Kazimî nivîsa, ‘‘Bi civaka demokratîk wê komplo werin têkbirin’’li ser rakirin. Her wiha bi postereke dagirkirina Serêkaniyê û Girê Spî bibîr dixe jî di meşê de ji aliyê jin û ciwanên Êzidî ve hate rakirin.
Girseya gel bê navber dirûşmên ‘‘Bijî Rêber Apo’’ û ‘‘Bijî Berxwedana Şengalê û Rojava’’ berz kriin.
Meşvan piştî gihiştin ber avahiya Meclîsa Gel a Şengalê bi navê Rêveberiya Xweser a Şengalê û TAJÊ daxuyanî hatin dayîn.
Beriya daxuyaniyaniyê, Endamê Meclîsa Rêveberiya Xweser a Şengalê Azad Hisên peyama Rêber Apo ya dibêje, ‘Ezê hesabê fermanê bixwazim û dest ji şopa jin û zarokên Êzidî yên hatine revandin bernedim’ xwend.
Piştî xwendina peyama Rêber Apo Hevserokê MXDŞ’ê Nayîf Şemo daxuyaniyê bi zimanê Kurdî xwend.
Di daxuyaniya ku Nayîf Şemo dixwend de îşaret bi van xalan hate kirin: “Meha Cotmehê meha komploya ne. Komploya yekemîn 1998’an li dijî Rêber Apo ku mafê jin û gelan diparast pêk hat. Hêzên desthilatdar bi pêşengiya Amerîka û NATO’yê Rêber Apo bi komployeke bêbext hedef girtin. Komploya duyemîn 9’ê Cotmeha 2019’an li dijî Rovaja çêbû. Dewleta Tirk û çeteyên wê êrîşê Girê Spî û Serêkaniyê kirin. Armanc giştî Rojava bû. Dixwestin Rêveberiya Xweser û şoreşa Rojava ji holê rakin. Komploya sêyemîn jî 9’ê Cotmeha 2020’an navbera dewleta Tirk, PDK û Iraqê de li dijî Şengalê û Êzidyan pêkhat. Dixwestin bi vê peymanê careke din Şengalê bixin bin destê pêşmerge (PDK) û Iraqê, da fermana 2014’an temam bikin.”
‘KOMPLO NEGIHIŞT ARMANCA XWE’
Nayîf Şemo di dewama daxuyaniyê de diyar kir, eger têkoşîn were mezinkirin dibe hemû komplo bi temamî têk biçin û got: “Herçend ev komplo zirerên mezin dabin jî, bi saya berxwedana Rêber Apo û gel ne gihîştiye armanca xwe. Ev jî dide nîşan ku eger em berxwedanê mezin bikin, dikarin komployan bi temamî têk bibin. Pêvajoya aşitî û demokrasiyê ku Rêber Abdullah Ocalan daye destpêkirin, wê serbikeve û komploger û qirker jî wê tune bibin.’’
‘TECRÎD BERDEWAM DIKE’
Bi navê Tevgera Azadiya Jinên Êzidî (TAJÊ) Dayê Neam Bedel jî di daxuyaniyê de axivî. Dayê Neam da zanîn ku tim xiyanet li Êzidiyan hatine kirin û wiha got: “Di vê rojê de xiyanet li Serokatiya me, pêşengên me û gelê me hate kirin. Ji 1998’an heya niha xiyanet li fikrê Rêber Apo û wî tê kirin. Li her derê xiyanet li Êzidiyan tê kirin. 27 sale tecrîd li ser Rêber Apo dewam dike. Raste hevdîtin hene, lê tecrîd dewam dike.’’
Dayê Neam diyar kir, Şengal ji aliyê şehîdan, şervanan û gel ve hatiye rizgarkirin, ewê rê nedin PDK derbasê Şengalê bibe û axaftina xwe wiha bi dawî kir: “Dîsa bi peymana di navbera hikûmeta herêmê, dewleta Tirk û hêzên navneteweyî hate kirin de, xwestin Şengalê dîsa bibin beriya 2014’an. Em dizanin dema PDK desthilatdar bû, di bin kontrola wî de teqîna Tilizêr û Sîbayê çêbû. Gelek xortên Êzidî di wan teqînan de hatin kuştin. Hîn jî birîndarên wê demê winda ne û hesab ji tu kesî ne hatiye xwestin. Ji 2014’an ve jî heman plan li ser me dewam dike. Naxwazin em hebin. Axa me bi xwîna şehîdan hatiye avdan û rizgarkirin, bi keda şervan û berxwedana gelê me hatiye rizgarkirin. Wê tu carî xayîn û xwefiroş nikaribin vê axê dagir bikin û bazirganiyê bi gelê me bikin.’’
Daxuyanî bi dirûşmeyên, ‘‘Bijî Rêber Apo’’ û ‘‘Bijî berxwedana Şengal û Rojava’’ bi dawî bû.
