Kongreya Star kampanyayek îzmeyan ji bo diyarkirina çarenûsa windayan û dîlan da destpêkirin. Dê kampanya di navbera 12-17’ê Adarê de bidome û 18’ê Adarê encam bê parvekirin. Dê kampanya bi awayê elektronîk û li ser medya civakî jî bê meşandin.
Endama Komîteya Têkilî û Tifaqa Siyaseta Demokratîk a Kongra Star Rûken Ehmed diyar kir ku di êrişên 6-29’ê Çileyê (2026) ên li ser taxên Şêxmeqsûd û Eşrefiyê yên Helebê, Dêr Hafir, Tebqa, Reqa, Dêrazorê û herêmên Rojavayê Kurdistanê de bi hezaran kes winda bûn.
Rûken Ehmed got: “Her çendî hikumeta demkî a Şamê ji Fermandarê Giştî yê QSD’ê Mazlûm Ebdî re gotibe 1070’ê kes li gel wan girtiye, lê hejmar pir zêdetir e. Hêjmar digihêje 4000 kesî.”
Rûken Ehmed da zanîn ku ew dixwazin banga gel û malbatên girtiyan radestî saziyên navnetewî bikin û wiha axivî: “Dê kampanya ne tenê di çarçoveya Rojava û Sûriyeyê de be. Dê kampanyayek vekîrî be. Em dixwazin zexteke navnetewî çêbikin. Komîteyên lêkolînê û hesabxwestinê bên çêkirin. Heyva Sor a Navnetewî derbasî girtîgehan bibe. Ji bo pêkhatina entegrasyonê mîsogeriyek navnetewî hebe.”
Daxwaz û armancên kampanyayê bi nameyekê hatine rêzkirin.
“Daxwaznameyeke fermî der barê dosyaya dîl û kesên bi zorê veşartî de
“Azadî ji bo dîl û girtiyên bi zorê”
Bi navê dayik, xwişk û keçên kesên ku bi hezaran winda û girtî ne, em Kongra Star, rêxistinên jinan, hêzên demokratîk û rêxistinên civaka sivîl, ji we dixwazin ku hûn vê daxwaznameyê îmze bikin.
Beşa armanckirî: Raya giştî ya navneteweyî, Neteweyên Yekbûyî û rêxistinên mafên mirovan ên navneteweyî.
Naveroka Daxwaznameyê Em ên ku li jêr îmze kiriye, hevgirtina xwe ya tevahî bi malbatên kesên girtî û windayî re li herêmên Şêx Meqsûd, Eşrefiyê, Dêr Hafir, Tebqa û Reqayê radigihînin. Em binpêkirinên eşkere û zextên sîstematîk ên ku ji hêla Hêzên Ewlekariya Giştî yên girêdayî Hikûmeta Veguhêz a Sûriyeyê ve tên kirin şermezar dikin, ku ev in:
• Binpêkirina peymanan: Nepabendiya bi peymanên ku bi Hêzên Sûrya Demokratîk re hatine îmzekirin.
• Tawanên şer: Kuştinên bêdadwerî yên belgekirî û ziyangihandina sivîlan.
• Veşartina bi zorê: Veşartina çarenûsa bi hezarên kesan di zindanên Ewlekariya Giştî de di bin tarîkirineke sîstematîk de.
Daxwazên Kampanyayê Em bang li Civaka Sivîl û saziyên têkildar (Xaça Sor, Rêxistina Mafên Mirovan, NY, CPT) dikin ku hemû yekser tedbîran bigirin û ji bo van tiştan tev bigerin:
• Çarenûsa hemû kesên winda û bi zorê veşartî yên di girtîgeh û navendên girtinê yên Hêzên Ewlekariya Giştî de bi awayekî eşkere û bilez bê diyarkirin.
• Hemû dîl û girtî bê şert û merc bên berdan û saxlemiya wan a fîzîkî û derûnî bê misogerkirin.
• Rawestandina yekser a hemû cureyên îşkenceyê, riswakirin û binpêkirinên mafên mirovan ên ku di bin navê operasyonên leşkerî de tên kirin.
• Avakirina komîteyeke lêpirsînê ya navneteweyî ya serbixwe û bêalî ji bo lêkolîna kuştinên bêdadwerî û belgekirina hemû binpêkirinên ku hatine kirin.
• Hesabxwestina ji sûcdar û kesên berpirsyarê van kiryaran da ku bê sizakirin nemînin, wekî stûneke bingehîn a dadmendiya veguhêz.
• Avakirina kanalên pêwendiyê yên lezgîn, di bin çavdêriya navneteweyî de (Xaça Sor), da ku malbat bikarin rewşa tenduristiya zarokên xwe nas bikin û destûr ji bo serdanan bê dayîn.
• Garantiyên qanûnî li dijî veguhastina girtiyan bo cihên din ên ku dibe ku jiyana wan bixe metirsiyê yan jî dosyaya veşartina wan a bi zorê bêtir tevlihev bike.
️Awayê Îmzekirinê Em ê heta 17ê Adara 2026an îmzeyên we berhev bikin.
Nameya tevahî (ku hûn dikarin li vir bixwînin) digel hemû îmzeyan dê di 18ê Adarê, Roja Navneteweyî ya Girtiyên Siyasî de ji saziyên navneteweyî re werin şandin.
Ji bo îmzekirinê, ji kerema xwe agahiyên jêrîn ji [email protected] re bişînin. Daneyên Elektronîk ên Piştgir û Îmzekeran:
1. Navê sêyane:……………………….
2. Navê kar û cihê wî:…………………
3. Cihê Rûniştinê: …………………….
“Pirsgirêka girtî û kesên veşartî babeteke mirovî ye ku ne mijara bazarê ye. Îmzeya we gaveke ber bi dadmendiyê ve ye.”
